ހައްދުފަހަނައަޅާފައިވާ އިސްރާއީލުގެ ސިފައިން ބަޑިޖަހާ މަރާލި އަލްޖަޒީރާގެ ނޫސްވެެރިޔާ ޝީރީން އަބޫ އަގްލީހްގެ ދިފާއުގައި ދުނިޔޭގެ ހުރިހާ ނުސްވެރިން ތެދުވުމަށް އިސްލާމިކް އޯގަނައިޒޭޝަން ފޯ ކަލްޗާ އެންޑް ސިވިލައިޒޭޝަން ( އައިއޯސީސީ ) ގެ ރައީސް އަދި ޕީޕީއެމްގެ އެޑްވައިޒަރު ޑރ.މުހައްމަދު ޝަހީމް އަލީ ސައީދު ގޮވާލައްވައިފިއެވެ.
ކުރީގެ އިސްލާމިކް މިނިސްޓަރުކަންވެސް ކުރެއްވި ޑރ.ޝަހީމް ކުރެއްވި ޓުވީޓެއްގައި ވިދާޅުވީ އިޒްރޭލް ސިފައިން، އަނިޔާވެރިގޮތެއްގައި އަލްޖަޒީރާގެ ނޫސްވެރިޔާ ޝީރީން ބަޑިޖަހައި މަރާލުމަކީ އިންސާނިއްޔަތުކަމާ ހިލާފު އަމަލެއް ކަމުގައެވެ.
އިޒްރޭލް ސިފައިން، އަނިޔާވެރިގޮތެއްގައި އަލްޖަޒީރާގެ ނޫސްވެރިޔާ ޝީރީން ބަޑިޖަހައި މަރާލުމަކީ އިންސާނިއްޔަތުކަމާ ޚިލާފު ޢަމަލެއް. ދުނިޔޭގެ އެންމެހާ ނޫސްވެރިން މިއަނިޔާވެރި ޖަރީމާ ކުށްވެރިކުރަންޖެހޭ.
— Mohamed Shaheem Ali Saeed (@Mohamedshaheem1) May 12, 2022
އެހެންކަމުން ދުނިޔޭގެ ހުރިހާ ނޫސްވެރިން އެކަން ކުށްވެރި ކުރަންޖެހޭނެ ކަން އެބޭފުޅާ ފާހަގަކުރެއްވިއެވެ.
ފަލަސްތީނަށް ނިސްބަތްވާ ޝީރީން މަރާލީ، ޖެނިންގައި ޔަހޫދީ ސިފައިންގެ ހައްދުފަހަނައަޅާފައިވާ އަނިޔާވެރިކަން ކަވަރުކުރުމުގައި އުޅެނިކޮށެވެ. ޔަހޫދީ ސިފައިން އޭނާ މަރާލި ނުސްވެެރިއެއްކަން އަންގައިދޭ ޖެކެޓުވެސް ލައިގެން ހުއްޓައެވެ.
އޭނާ އަކީ 2000 ވަނަ އަހަރުން ފެށިގެން އަލްޖަޒީރާގައި މަސައްކަތް ކުރަމުން އަންނަ ހިތްވަރުގަދަ ނޫސްވެރިއެކެވެ.
