ކުރީގެ ރައީސް އަބްދުﷲ ޔާމީންގެ ވެރިކަމުގައި ހުޅުމާލޭގެ ދެވަނަ ފިޔަވަހީގައި ގާއިމްކޮށްދެއްވި ހިޔާ ފްލެޓްތައް ލިބުނު މީހުންގެ ތެރެއިން ”ހިޔާ ޔޫނިއަން“ މެދުވެރިކޮށް އެކަނިވެސް 900 އަށް ވުރެ ގިނަ މީހުން ފްލެޓް ބަދަލުކުރަން އެދިއްޖެ އެވެ.
ލިބުނު ފްލްޓް އެހެން މީހަކާއި ބަދަލު ކުރުމަށް ހުޅުވައިލުމުން ”ހިޔާ ޔޫނިއަން“ ގެ ފްލެޓް އެކްސްޗޭންޖް ޕްލެޓްފޯމުގެ ހިދުމަތް 900 އަށް ވުރެ ގިނަ މީހުން ހޯދާފައިވާ ކަމަށް އެ ޔޫނިއަނުން ބުންޏެވެ.
އެ ޔޫނިއަނުން އަންނަނީ ފްލެޓް ލިބުނު މީހުން ހިމެނޭ ވައިބާ ގްރޫޕެއް ވެސް ހިންގަމުންނެވެ. އެ ވައިބާ ގްރޫޕުގައި ވެސް އެތައް ބަޔަކު އަންނަނީ ފްލެޓު ބަދަލުކުރަން އެދެމުންނެވެ.
ފިނިޝިންގެ މަސައްކަތް ނުނިންމައި ދޫކުރާ މި ފްލެޓުތަކުގެ ކުއްޔަކީ ސާވިސް ފީއާ އެކު 8،500 ރުފިޔާއެވެ.
