ކުރީގެ ރައީސް މައުމޫން އަބްދުލްގައްޔޫމުގެ ވެރިކަމުގައި ނޫސްވެރިކަން އޮތް ހާލަތަށް ނޫސްވެރިކަން ބަދަލުކުރުމަށް ބައެއް ބޭފުޅުން އުޅުއްވާ ކަމަށް ސިފަކޮށް، ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ފާޑުވިދާޅުވެއްޖެއެވެ. މެންބަރު ވައްޑެ މިބީދައިން ވިދާޅުވެފައިވަނީ އެބޭފުޅާ ކުރެއްވި ޓްވީޓެއްގައެވެ.
ރައީސް މައުމޫނު ޒަމާނުގެ ނޫސްވެރިކަމަކީ ސަރުކާރު އިޢުލާނާ އިޝްތިހާރު ގޮތުގައި ފައިސާ ދީގެން، ސަރުކާރު ޕްރޮޕަގަންޑާ ފަތުރަން ވަޒީރުން ލައްވައި ހިންގުވާ ކަމެކެވެ. މިހާރު އަނެއްކާ އެމަގަށް ނޫސްވެރިކަން ބަދަލުކުރަން ބައެއް ބޭފުޅުން އުޅުއްވާތީ ފެންނަކަމީ ވަރަށް ދެރަވަރު ކަމެކެވެ.
— Waddey (@waddey_) July 17, 2021
ރައީސް މައުމޫންގެ ވެރިކަމުގައި ނޫސްވެރިކަން އޮތް ހާލަތު ސިފަކުރައްވަމުން، ވައްޑޭ ވިދާޅުވީ އެއިރު ނޫސްވެރިކަމަކީ، ސަރުކާރުގެ އިއުލާނާއި އިޝްތިހާރު ގޮތުގައި ފައިސާ ދީގެން ސަރުކާރު ޕްރޮޕަގަންޑާ ފަތުރަން ވަޒީރުން ލައްވާ ހިންގުވާ ކަމެއްގެ ގޮތުގައެވެ. އަދި މިހާރު އެމަގަށް ނޫސްވެރިކަން ބަދަލުކުރަން ބައެއް ބޭފުޅުން އުޅުއްވާތަން ފެންނަކަމީ ދެރަވަރު ކަމެއް ކަމަށް ވައްޑެ ސިފަކުރެއްވިއެވެ.
ސަރުކާރުގެ ފަރާތުން އަދި ސިޔާސީ ނުފޫޒުގަދަ ވެރިންގެ ފަރާތުން ނޫސްވެރިކަމަށް އަންނަ ހުރަސްތަކަކީ އަބަދުވެސް ކުރިމަތިވަމުން އަންނަ ހުރަސްތަކެކެވެ. ހާއްސަގޮތެއްގައި ސަރުކާރުގެ އެކިއެކި މައްސަލަތަކާއި ގުޅޭގޮތުން ވާހަކަދައްކާ ނޫސްވެރިންނަށް ކޮންމެ ސަރުކާރަކުންވެސް އެކި ގޮތްގޮތުން ދަތިކުރަމުން ދާކަމީ ހިތާމަވެރި ހަގީގަތެކެވެ.
