ޔޫރަޕުގައި ބާއްވާ އެންމެ ޝަރަފުވެރި ފުޓުބޯޅަ މުބާރާތް ކަމުގައިވާ ޔޫރޯގެ އެންމެ މޮޅު ޒުވާން ކުޅުންތެރިއަކަށް ސްޕެއިންގެ މިޑްފީލްޑަރު ޕެޑްރީ ގޮންޒާލޭސް ލޮޕޭޒް ހޮވިއްޖެއެވެ.
އުމުރުން އެންމެ 18 އަހަރުގެ ޕެޑްރީ ވަނީ މުބާރާތުގައި މޮޅު ކުޅުމެއް ދައްކައިފައެވެ. ސްޕެއިން ސެމީ ފައިނަލާއި ހަމައަށް ގެންދިއުމުގައި ޕެޑްރީ ވަނި އިސް ދައުރެއް އަދާ ކޮށްފައެވެ.
މި މުބާރާތުގައި ޖުމްލަ 6 މެޗު ޕެޑްރީ ކުޅެފައިވާއިރު 629 މިނެޓު ވަނީ ދަނޑު މަތީގައި ހޭދަކޮށްފައެވެ. އަދި މި މުބާރާތުގައި އޭނާ ވަނީ 76.1 ކިލޯ މީޓަރުގެ ސަރަހައްދެއް ކަވަރު ކޮށްފައެވެ.
ސެމީ ފައިނަލުގައި އިޓަލީ އަތުން ޕެނަލްޓީ ޖަހައިގެން ބަލިވިއިރު އޭނާ ވަނީ އެމެޗުގެ 120 މިނެޓުގައި ކުޅެ 66 ޕާހުގެ ތެރެއިން 65 ޕާސް ފުރިހަމަ ކޮށްފައެވެ.
