އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ހުޅުމާލެ ފޭސް 2 ހިއްކުމަށްފަހު ބިނާކުރި ހިޔާ ފްލެޓްތަކަށް މި ސަރުކާރުން ކަނޑައެޅި ކުލި ބޮޑު ކަމަށް އެމްޑީޕީގެ ޕާލިމެންޓް ގްރޫޕުގެ ލީޑަރު އަދި މެދު ހެންވޭރު ދާއިރާގެ މެންބަރު އަލީ އާޒިމް ވިދާޅުވެއްޖެއެވެ.
އަލީ އާޒިމް ދާދި ދެންމެއަކު ކުރެއްވި ޓުވީޓެއްގައި ވިދާޅުވީ ހިޔާ ފްލެޓްތަކަކީ ސޯޝަލް ހައުސިން އަށް އަމާޒުކޮށްގެން ބިނާކުރެވިފައިވާ ފްލެޓްތަކެއް ކަމަށެވެ.
”އެތަނަށް ވަންނަ ފަރާތްތަކުގެ އެވްރެޖް އާމްދަނީ އަކީ 5،000ރ. ދެން ކިހިނެތްތޯ 8،500ރ ކުލީގެ ގޮތުގައި ދައްކާނީ“ އާޒިމް ވިދާޅުވިއެވެ.
އާޒިމް ވިދާޅުވިގޮތުގައި ސަރުކާރުން އެކަމަށް ހައްލެއް ނުހޯދައިފިނަމަ ގަވައިދުން ކުލި ދައްކާ ފަރާތްތައް މަދުވާނެއެވެ.
ހިޔާ ފްލެޓްތަކަކީ ސޯޝަލް ހައުސިންނަށް އަމާޒުކޮށްގެން ބިނާކުރެވިފައިވާ ފްލެޓްތަކެއް. އެތަނަށް ވަންނަ ފަރާތްތަކުގެ އެވްރެޖް އާމްދަނީއަކީ 5000ރ. ދެންކިހިނެތްތޯ 8500ރ ކުލީގެ ގޮތުގައި ދައްކާނީ. މިކަމަށް ޙައްލެއް ހޯދެންޖެހޭ. ނޫންނަމަ ގަވާއިދުން ކުލިދައްކާ ފަރާތްތައް މަދުވާނެ.
— 𝐀𝐥𝐢 𝐀𝐳𝐢𝐦 (@aliaazim) July 14, 2021
ރައީސް ޔާމީންގެ ސަރުކާރުން ނިންމީ ފެލްޓެއް 5،600 ރުފިޔާއަށް ދިނުމަށެވެ. އެއީ ފިނިޝިންގ މަސައްކަތްވެސް ސަރުކާރުގެ ހަރަދުގައި ކުރުމަށް ފަހުގައެވެ. އެހެން ނަމަވެސް ފިނިޝިންގެ މަސައްކަތް ނުހިމަނައި މެއިންޓެނެންސް ފީއާއި އެކު ރައީސް އިބްރާހީމް މުހައްމަދު ސޯލިހު ނިންމެވީ ފެލްޓް ލިބޭ ފަރާތްތަށް ކޮންމެ މަހަކު 8،500 ރުފިޔާ ދެއްކުމަށެވެ.
