ޗައިނާގެ އެހީގައި މާލެސިޓީ ކައުންސިލުން މާލޭ ބޮޑު ތަކުކުރުފާނު މަގުގައި ހަރުކުރި ސްމާޓް ސްޓްރީޓް ލައިޓްތަކުން ތަކުބީރު އިއްވަން ފަށައިފި އެވެ.
ޙައްޖު ދުވަހުގެ މެންދުރުން ފަހުން ފެށިގެން އެ ލައިޓްތަކުން ވަނީ އަޑު ހަރުކޮށް ތަކުބީރު އިއްވަން ފަށާފައެވެ.
މާލެސިޓީ ކައުންސިލުން ބުނީ ޢީދު ނިމެންދެން ތަކުބީރުގެ އަޑު އިވެމުންދާނެ ކަމަށެވެ.
މާލެ ސިޓީ ކައުންސިލްގެ ސްމާޓް ސްޓްރީޓް ލައިޓުތަކުން މިއަދު މެންދުރު ފަހުން ފެށިގެން ވަނީ ތަކުބީރު އިއްވަން ފަށާފަ. pic.twitter.com/2kMtec8VsD
— Malé City Council (@MaleCitymv) June 27, 2023
އެގޮތުން މިއަދު ހަވީރު 16:15 އިން ފެށިގެން 18:00 އަށް އަދި ރޭގަނޑު 20:15 އިން 22:00 އަށް ތަކުބީރު އަޑު އިވޭނެއެވެ. އަދި އަޟްޙާ ޢީދު ދުވަހުގެ ހެނދުނު 6:00 އިން ފެށިގެން 7:25 އަށް އަދި ހެނދުނު 8:15 އިން 11:30 އާއި މެންދުރުފަހު 14:15 އިން 18:00 އަދި ރޭގަނޑު 20:15 އިން 22:00 އަށް ތަކުބީރު އަޑު އިވޭނެއެވެ. އަދި 29 ޖޫން ވާ ބުރާސްފަތި ދުވަހުގެ މެންދުރުފަހު 13:00 އިން 15:00 އަށް އަދި ރޭގަނޑު 20:15 އިން 22:00 އަށް މި ލައިޓްތަކުން ތަކުބީރުގެ އަޑު އިވޭނެ ކަމަށް ކައުންސިލުން ބުންޏެވެ.
މާލޭގައި ޖަހަން ފަށާފައިވާ ސްމާޓް ސްޓްރީޓް ލައިޓް ތަކުގައި ސްޕީކާ ސިސްޓަމުގެ އިތުރުން ފްރީ ވައިފައި އާއި ޑިޖިޓަލް ލެޑް ސްކްރީނާއި، ސީސީޓީވީ ކެމެރާގެ އިތުރުން މޫސުމަށް އަންނަ ބަދަލުތައް ދެނެގަތުމަށް ފަސޭހަ ވާނެހެން އެންވަޔަރަންމަންޓް ސެންސަރު ހަރު ކޮށްފައިވެއެވެ.
ކައުންސިލުން ދަނީ އެ ބައްތިތައް މެދުވެރިކޮށް އެކިއެކި ދީނީ އަދި ޤައުމީ މުނާސަބަތުތައް ފާހަގަކުރުމަށް އެކި މެސެޖުތައް ދެމުންނެވެ. އެހެން ނަމަވެސް ސްޕީކަރު ސިސްޓަމް މެދުވެރިކޮށް އަޑު ފޮނުވާ މިއީ ފުރަތަމަ ފަހަރުކަން ފާހަގަކޮށްލެވެއެވެ. މިކަމާއި ގުޅިގެން އާންމުން ދަނީ ކައުންސިލާއި މޭޔަރަށް ޝުކުރު ދަންނަވަމުންނެވެ.
Male’ city council thaareekhuge thereyah. Thakbeeru ge adun Male’ gugumaalaifi.
Jazaakumullah khairan. @MaleCitymv pic.twitter.com/r1QeY3Uzqy— Ali Rameez (@aliramyz) June 27, 2023
މާލެ ސިޓީކައުންސިލުން ވަނީ މިއަހަރުގެ އަޟްޙާ ޢީދަށް މަރުޙަބާ ކިޔުމުގެ ގޮތުން މާލޭގެ ބޮޑުތަކުރުފާނު މަގާއި، މަޖީދީމަގު އަދި ސޯސަންމަގުގެ އިތުރުން ވިލިމާލެ ހިމެނޭހެން ބައެއް ބޮޑެތި މަގުތައް ޒީނަތްތެރި ކުރުމަށް މާލެ އާއި ވިލިމާލޭގައި ޖުމްލަ 22 ގިޑިގެ އާއެކު 2224 ބޮކި ހަރުކޮށް ދިއްލާލާފައެވެ.
