ސަރުކާރުގެ ރަސްމީ ދަތުރުތަކަށް މިއަހަރުގެ ބަޖެޓުން ހަރަދުކުރި މިންވަރު މިދިޔަ އަހަރަށްވުރެ ބޮޑުތަނުން އިތުރުވެއްޖެ އެވެ.
ފިނޭންސް މިނިސްޓްރީގެ ތަފާސްހިސާބުތަކުން ދައްކާގޮތުގައި މި އަހަރުގެ މި މަހުގެ 27 ގެ ނިޔަލަށް ސަރުކާރުން ވަނީ ދަތުރުތަކަށް 153.6 މިލިއަން ރުފިޔާ ހަރަދުކޮށްފަ އެވެ. މިއީ މިދިޔަ އަހަރުގެ އެ މުއްދަތުގެ ތެރޭގައި އަޅާބަލާއިރު، 55.8 މިލިއަންގެ އިތުރުވުމެކެވެ. މިދިޔަ އަހަރުގެ ސެޕްޓެމްބަރު 27ގެ ނިޔަލަށް ސަރުކާރުން ދަތުރުތަކަށް ހަރަދުކޮށްފައިވަނީ 97.8 މިލިއަން ރުފިޔާ އެވެ.
މި އަހަރު ދަތުރުތަކަށް ހަރަދު ކުރުމަށް ޖުމްލަ 203 މިލިއަން ރުފިޔާ ބަޖެޓުކޮށްފައިވެ އެވެ.
ދަރަނި ބޮޑުވެ ސަރުކާރުގެ އާމްދަނީ ދަށްވި ނަމަވެސް ރައީސް އިބްރާހީމް މުހައްމަދު ސޯލިހާއި އެމަނިކުފާނުގެ ބޭފުޅުން ގެންދަވަނީ ހުއްޓުމެއް ނެތި ދަތުރުތައް ކުރައްވަމުންނެވެ.
