މާލޭ ސިޓީގެ މޭޔަރު ޑރ. މުޙައްމަދު މުޢިއްޒު މިއަދު ކުރެއްވި ޓުވީޓެއްގަ މާލެ ސިޓީ ރައްޔިތުނާ ބައްދަލުކުރުމަށް ބާއްވާ މިއަހަރުގެ ދެވަނަ ބައްދަލުވުން އިއުލާން ކުރައްވައިފިއެވެ.
މުޢިއްޒު ވިދާޅުވީ ސިޓީ ކައުންސިލްއިން ބާއްވާ ރައްޔިތުންގެ ބައްދަލުވުމުގެ މިއަހަރުގެ ދެވަނަ ބައްދަލުވުމެއް ބާއްވަން ނިންމާފައިވާ ކަމަށާއި، ވޭތުވެދިޔަ ހަމަހުގެ ސިޓީ ކައުންސިލުގެ މަސައްކަތްތަކުގެ ތަފުޞީލު ރައްޔިތުންނާ ހިއްސާކުރައްވާނެ ކަމުގައެވެ. އަދި ކުރިއަށް އޮތް ތަނުގައި ސިޓީ ކައުންސިލުގެ ފަރާތުން ކުރުމަށް ރާވާފައިވާ މުހިންމު ކަންކަމުގެ މަޢުލޫމާތު ވެސް ދެވިގެން ދާނެކަމުގައެވެ. މީގެ އިތުރުން ރައްޔިތުންގެ ހިޔާލާ މަޝްވަރާ ހުށަހެޅުމުގެ ފުރުސަތު މިބައްދަލުވުމުގައި އޮނާނެ ކަން މޭޔަރު ފާހަގަކުރެއްވިއެވެ.
މި ބައްދަލުވުން ބޭއްވުމަށް ހަމަޖެހިފައިވަނީ 19 ޖުލައި 2022 ވާ އަންގާރަ ދުވަހުގެ ރޭ 20:30 ގައި ލޮނުޒިޔާރަތް ޕާކުގައެވެ.
މިބައްދަލުވުމުގައި ވީހާވެސް ގިނަ ދާއިރާތަކުގެ މެންބަރުން ބައިވެރިވުމަށް ވަނީ އެދިފައެވެ. މިދާއިރާތަކުގެ ތެރޭގައި ހުޅުމާލެ، ހެންވޭރު، ގަލޮޅު، މައްޗަންގޯޅި، މާފަންނު، އަދި ވިލިމާލެ ހިމެނެއެވެ.
Rayyithunnge bahdhaluvumuge miaharuge 2 vana bahdhaluvun 19 July 2022 gai, Lonuziyaarai Park gai onnaane. Veythuvi 6 mahuge report, kuriyah oi aharuge masakakthu thaaval, budget hushahelhun, rayyithunge khiyaal aa mashwara, adhives ithuru kankan. Mi bahdhalvumah dhauvath aruvan pic.twitter.com/PrOz7suQHz
— Dr Mohamed Muizzu (@MMuizzu) July 11, 2022
މުޅި މާލެ ސިޓީއަށް އަމާޒުކޮށް ބޭއްވި މިފަދަ ފުރަތަމަ ރައްޔިތުންގެ ބައްދަލުވުމަށް ވަނީ ވަރަށް ބޮޑު ތަރުޙީބެއް ރައްޔިތުންގެ ފަރާތުން ލިބިފައެވެ.
ލާމަރުކަޒީ ޤާނޫނުގައި ވާގޮތުން ރައްޔިތުންނަށް ޢާންމުކޮށް ހުޅުވާލާފައިވާ ބައްދަލުވުމެއް ކޮންމެ އަހަރަކު ދެފަހަރު ސިޓީ ކައުންސިލުންނާއި ރަށްރަށުގެ ކައުންސިލްތަކުން ބާއްވަން ވާނެއެވެ.
