ރާއްޖޭގެ އިގްތިސާދުގެ މައިދޮރާށި ކަމުގައިވާ ވެލާނާ އިންޓަނޭޝަނަލް އެއާޕޯޓް ދިވެހިންގެ އަތްމަތީގައި އޮތީ މާލޭގެ މޭޔަރު ކަމަށް ވާދަކުރައްވާ އަލް އުސްތާޒާ އާޒިމާ ޝަކޫރު ކުރެއްވި ބުރަ މަސައްކަތުން ކަމުގައި ރައީސް އޮފީހުގެ އަންޑާ ސެކެޓްރީ އިބްރާހީމް އަބާން އަބްދުއްލަތީފް ވިދާޅުވެއްޖެއެވެ.
އަބާން ކުރެއްވި ޓުވީޓެއްގައި ވިދާޅުވީ ގައުމަށް އަގު ހުރި ހިދުމަތެއް ކުރައްވާފައި ހުންނެވި ބޭފުޅަކު މާލޭގެ މޭޔަރުކަމަށް ވާދަކުރެއްވުމުން އިތުރު ވިސްނުމަކަށް ދިއުމުގެ ބޭނުމެއް ނެތް ކަމުގައެވެ.
”ކުރީގެ ސަރުކާރަކުން ގައުމުގެ މައިދޮރާށި ބޭރު ކުންފުންޏަކަށް މަދު ފައިސާ ކޮޅަކަށް ދިނުމުން ސިންގަޕޫރުގެ އާބިޓްރޭޝަން ކޯޓަށް ގޮސް ދިވެހިންނަށް އަލުން އެއާޕޯޓު ހޯދާދެއްވީ އާޒިމާ.“ އަބާން ވިދާޅުވިއެވެ.
މަދު ބަޔަކު ނޫނީ ނުދައްކާ ވާހަކައެެކެވެ. އެހެންނަމަވެސް އެކަމެއްގެ ސަބަބުން މުޅި ދިވެހި ގައުމަށާއި ހުރިހާ ރައްޔިތުންނަށް އެތަށް ފައިދާއެއް އަދި ލުއި ފަސޭހަކަމެއް ލިބިގެންދާ ކަމަކެވެ. އަޅުގަނޑުމެންގެ ގައުމުގެ މައިދޮރާށީގެ ބާރު އަޅުގަނޑުމެންގެ އަތުގައި އޮތުން.
— Ibrahim Abaan Abdul Latheef (@IbrahimAbaann) January 4, 2024
އިންޑިއާގެ ޖީއެމްއާރު ކުންފުންޏަށް އެއާޕޯޓު ހިންގަން ދިގު މުއްދަތަކަށް ހަވާލު ކޮށް، ނުއަގުގައި ބޭރުގެ ބަޔަކަށް އެއާޕޯޓު ވިއްކާލި ކަމުގެ ތުހުމަތު އަމާޒުވީ ކުރީގެ ރައީސް މުހައްމަދު ނަޝީދުގެ ވެރިކަމުގައެވެ. އަދި ރައީސް ވަހީދުގެ ވެރިކަމުގެ ކުރު މުއްދަތެއްގެ ތެރޭގައި ޖީއެމްއާރުން ސިންގަޕޫރުގެ އާބިޓްރޭޝަނަށް އެ މައްސަލަ ހުށަހެޅުމުން ދައުލަތުގެ ފަރާތުން ގާނޫނީ ވަކީލެއްގެ ހައިސިއްޔަތުން ވަކާލާތު ކުރައްވަން ވަޑައިގެންނެވީ އާޒިމާ އެވެ.
