ޕީޕީއެމް/ޕީއެންސީގެ ޓިކެޓުގައި މާލޭގެ މޭޔަރު ކަމަށް ވާދަކުރައްވާ އައިޝަތު އާޒިމާ ޝަކޫރު އެ މަގާމަށް ހޮވަންވީ ސަބަބުތައް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވިދާޅުވެދެއްވައިފިއެވެ.
”އަޅުގަނޑުމެން މިތިބީ ރައްޔިތުންނަށް ޓަކައި ޚިދުމަތް ކުރަން އައިސް، ރައްޔިތުން އަޅުގަނޑު އިންތިހާބު ކުރީ ރައްޔިތުންނަށް ޚިދުމަތް ކުރަން، ކައުންސިލަށް ކައުންސިލަރުން އިންތިހާބު ކުރަނީ އެ ކައުންސިލެއް ނިސްބަތްވާ ރަށެއްގެ ނުވަތަ ސިޓީއެއްގެ ރައްޔިތުންނަށް ހިދުމަތް ކުރަން، މޭޔަރަކު އިންތިހާބު ކުރަނީ ނުވަތަ ކައުންސިލެއްގެ ރައީސް އިންތިހާބު ކުރަނީ އެރަށެއްގެ ކަންތައްތައް އެންމެ އިސްކޮށް ބެލެހެއްޓުމުގެ ޒިންމާ ހަވާލުކޮށް އެ ޒިންމާ ރަނގަޅަށް އަދާކުރުމަށް އިތުބާރު ކޮށްފައި“ ރައީސް މުއިއްޒު ވިދާޅުވިއެވެ.
ރައީސުލްޖުމުހޫރިއްޔާ ވިދާޅުވީ މިއަދުގެ މައުޟޫއު ހާއްސަވަނީ މާލެ ސިޓީއަށްކަމަށާއި މާލޭ މޭޔަރު ހޮވުމަށްޓަކައި 13ވަނަ ދުވަހު ބާއްވާ އިންތިހާބަކީ މާލޭގެ ރައްޔިތުން ވަރަށް ފުންކޮށް ވިސްނަން ޖެހޭ އިންތިހާބެއްކަމަށެވެ.
އަދި އެ މަސައްކަތް ކުރުމުގައި ރައްޔިތުން ވަރަށް ކައިރިން ބެލިކަމަށާއި އެމަނިކުފާނު ވެވަޑައިގެންނެވި ވައުދާ އެއްގޮތަށް ފުރަތަމަ ދުވަހުން ފެށިގެން ޕްލޭނެއް އެކުލަވާލައްވާ މަސައްކަތްތަކެއް ކުރެއްވި ކަމަށް ވެސް އެމަނިކުފާނު ވިދާޅުވިއެވެ.
އަދި އެމަނިކުފާނުގެ މޭޔަރުކަމުގެ ދަށުން ސަރުކާރުން އެއްބާރުލުން ދީގެން ނޫނީ ކުރެވެން ހުރި ކަންކަން ފިޔަވާ ދެން ވައުދުވި ހުރިހާ ކަމެއް ކުރެވުނުކަން ރައީސް ވަނީ ފާހަގަކުރައްވާފައެވެ.
މާލޭ މޭޔަރުކަމަށް އަންނަ ބޭފުޅެއްގެ ގޮތުން ސަރުކާރަށް ޖެއްސުން ކުރުމަށް މާލޭގެ ތަރައްގީއަށް ކުރެވެން ހުރި ކަންކަން ނުކޮށް ދޫކޮށްލާފާނެކަމަށް އެމަނިކުފާނު ވިދާޅުވިއެވެ.
ރައީސް ޑރ. މުއިއްޒު ވިދާޅުވީ ސަރުކާރާ އެކީގައި މަސައްކަތް ކުރަން ނެތް ޕާޓީއަކުން ބޭފުޅަކު ހޮވައިފި ނަމަ އަނެއްކާ ވެސް މާލޭ ރައްޔިތުން ތަކުރާރު ކުރަން ޖެހޭނީ ކަންކަން ނުވެ ދާ ދުވަސްތަކެއް ކަމަށެވެ.