މާލެ ސަރަހައްދުގެ މިސްކިތްތަކުގައި ޖަމާއަތުގައި ނަމާދުކުރަން ފެށުމަށް ތައްޔާރު ވަމުން އަންނަ ކަމަށް އިސްލާމިކް މިނސްޓްރީއިން މިއަދު ބުނެފިއެވެ.
އޮންލައިން ނޫހެއްކަމުގައިވާ ”އަދަދު“ އަށް މައުލޫމާތު ދެއްވަމުން އިސްލާމިކް މިނިސްޓަރ ޑރ. އަހުމަދު ޒާހިރު ވިދާޅުވީ މާދަމާ ނުވަތަ އޭގެ އަނެއް ދުވަހު ޖަމާއަތުގައި ނަމާދު ކުރަން ފެށޭތޯ މަސައްކަތް ކުރަމުން އަންނަ ކަމަށެވެ.
”ހުކުރުގެ ކުރިން ޖަމާއަތުގައި ނަމާދު ކުރަން އިރާދަކުރެއްވިއްޔާ ފަށާނަން،“ މިނިސްޓަރު ވިދާޅުވި އެވެ.
މިނިސްޓަރ އިތުރަށް ވިދާޅުވީ ޖަމާއަތުގައި ނަމާދު ކުރަން ފެށިނަމަވެސް އަދި ނަމާދު ކުރާނީ ގައިދުރުކަން ބަހައްޓައިގެން ކަމަށެވެ.
ކޮވިޑްގެ ކޭސްތައް މާލެ ސަރަހައްދުގައި މަދުވެފައިވާއިރު ޖަމާއަތުގައި ނަމާދު ކުރަން ނުފަށާތީ އާންމުން އަންނަނީ އެކަމާ ފާޑުކިޔަމުންނެވެ.
