ކުރީގެ ރައީސް އަބްދުﷲ ޔާމީންގެ ވެރިކަމުގައި ސައޫދީގެ ރަސްގެފާނު ސަލްމާން ބިން އަބްދުލްއަޒީޒްގެ ހިލޭ އެހީގައި މާލޭގައި އިމާރާތް ކޮށްފައިވާ ކިންގް ސަލްމާން މިސްކިތުގައި އަންނަ ހުކުރު ދުވަހު ނަމާދު ކުރަން ފަށާނެ ކަމަށް އިސްލާމިކް މިނިސްޓްރީން ބުނެފި އެވެ.
އިސްލާމިކް މިނިްސްޓްރީން ބޭއްވި ނޫސްވެރިންގެ ބައްދަލުވުމުގައި އިސްލާމިކް މިނިސްޓަރު އަހުމަދު ޒާހިރު ވިދާޅުވީ ސަލްމާން މިސްކިތް ރަސްމީކޮށް ހުޅުވާނީ ފަހުން ކަމަށެވެ. ނަމަވެސް ރޯދަ މަހު އެ މިސްކިތުގައި ނަމާދު ކުރުން ކުރިއަށްދާނެ ކަމަށެވެ.
ސަލްމާން މިސްކިތުގެ ހުރިހާ މަސައްކަތެއް ނިމިފައި ހުންނަތާ 4 ވަރަކަށް އަހަރު ވަނީ ވެފައެވެ. އަދި އެ މިސްކިތް ސަރުކާރުން ހުޅުވާފައިނުވާތީ ގިނަ ބަޔަކު އަންނަނީ ސަރުކާރަށް ފާޑުކިޔުން އަމާޒުކުރަމުންނެވެ.
