ތައުލީމީ ވަޒީރު ޑރ. އިސްމާޢީލް ޝަފީޢު ވިދާޅުވި ގޮތުގައި ”ޤައުމިއްޔަތު“ މާއްދާ ޓެސްޓުކުރަން ފުރަތަމަ ކިޔަވައިދޭނީ ގްރޭޑް 4 އަށެވެ.
ރާއްޖޭގައި މިހާރުވެސް ދަނީ އެހެން މާއްދާތަކުގެ ތެރެއިން ’ގައުމިއްޔަތު‘ އުނގަންނައިދެމުން ކަމުގައި ވަޒީރު ވިދާޅުވިއެވެ.
އެ މާއްދާއަކީ ފުޅާ އަދި މުހިއްމު މާއްދާއެއް ކަމަށްވުމުން ވަކި މާއްދާއެއްގެ ގޮތުގައި ގައުމިއްޔަތު ކިޔަވައިދީފިނަމަ، އޭގެ ސަބަބުން ބެލެނިވެރިންނާއި ދަރިވަރުންނަށް ގައުމިއްޔަތާއިބެހޭ އިތުރު ސައްހަ މައުލޫމާތު ލިބި ގައުމަށް ދަރިވަރުންގެ ހިތުގައި އޮތް ލޯބި އިތުރުވާނެކަމަށް ވެސް ވިދާޅުވިއެވެ.
ގައުމިއްޔަތު މާއްދާގެ ޕައިލެޓުކުރުން ގާތްގަނޑަކަށް 3 ހަފްތާ ތެރޭގައި ފެށިގެންދާނެކަމަށް ވަޒީރު ވިދާޅުވެފައިވެއެވެ. އަދި، އެ ޕްރޮގްރާމް ފެށުމުގެ ކުރިން ވާންޖެހޭ ތައްޔާރީތައް ވަމުންދާކަމަށް ވަޒީރު ވިދާޅުވެފައިވެއެވެ.
މީގެ އިތުރުން، ގްރޭޑް 4 ގެ ދަރިވަރުންނަށް ގައުމިއްޔަތު މާއްދާ ޕައިލެޓް ކުރުމަށްފަހު އެ ޓެސްޓުން ނިކުންނަ ނަތީޖާތަކަށް ގޮތް ނިންމުމުގައި ރިއާޔަތްކުރާނެކަން ވަޒީރު ފާހަގަކޮށްފައިވެއެވެ.
ޕްރޮގްރާމްގެ ނަތީޖާއަށް ބެލުމަށްފަހު ރަސްމީކޮށް މަންހަޖުގައި ހިމަނާނަން“ވަޒީރު ޑރ. ޝަފީއު ވިދާޅުވިއެވެ.
އެ މާއްދާ މަންހަޖުގައި ހިމެނުމަށްޓަކައި އެ މާއްދާގެ މުގައްރަރު އެކުލަވައިލުމުގެ މަސައްކަތް އެ ފަންނުގެ މާހިރުންގެ އެހީއާއިއެކު ކުރަމުންދާކަމަށް ވަޒީރު ވިދާޅުވިއެވެ.
