ރައީސް ޔާމިންއަށް މިސަރުކާރުން ދެމުންދާ އަނިޔާތައް އިންތިހާއަށް ގޮސްފި: ޑރ. މުޢިއްޒު

13 ގަޑިއިރަށް ދިގު ދަންމާލި ރައީސް ޔާމީންގެ ޝަރީޢަތް ޑރ. މުޢިއްޒު ސިފަކުރެއްވީ ރައީސް ޔާމީން އައި މެދު ރައްޔިތުންގެ ހިތްތަކުގައި އޮތް ލޯބި ފިލުވާލެވޭނެކަމަށް ހީކޮށް ސަރުކާރުން ހިންގެވި ފިނޑި ޢަމަލެއްގެ ގޮތުގައެވެ.

ރައީސް އަބްދުﷲ ޔާމީން އަބްދުލް ޤައްޔޫމް އާއިމެދު މިސަރުކާރުން ދެމުންގެންދާ އަނިޔާތައް އިންތިހާއަށް ގޮސްފައިވާކަމަށާއި، އެ ނާތަހުޒީބު ފިނޑި ޢަމަލު ތަކުން އިރާދަކުރެއްވިއްޔާ ރައީސް ޔާމީންއަށް އޮތް ތާއީދު ދަނީ އިތުރުވަމުން ކަމަށް ޑރ. މުޢިއްޒު ގެ ޓްވީޓްގައި ވިދާޅުވިއެވެ.

Raees Yameen aa medhu mi sarukaarun dhemun dhaa aniyaa ge inthihaa ah mivanee gosfai. RY aa medhu rayyithunge hiythakugai oi loabi filuvaaleveyne kamah heekoh kuraa mifadha findi, naathahuzeeb amalu thakun in sha Allah emainkfaanah oi thaaeedh dhaanee ithuruvamun. #RY2023 pic.twitter.com/WluFdsZFns

— Dr Mohamed Muizzu (@MMuizzu) June 12, 2023

ރައީސް ޔާމީންގެ އިސްތިޢުނާފު މައްސަލަ މަދު ޖައްސާލުމަށްފަހު ދަށު ކޯޓުގައި ހިނގަމުންދާ ފުއްގިރި މައްސަލައާއި ގުޅޭ ޝަރީޢަތްތައް ދިގުދަންމަމުންދާތީ އިދިކޮޅުގެ ލީޑަރޝިޕާއި އެކު ރައީސް ޔާމީންގެ ސަޕޯޓަރުން މިއަދު ވަނީ ރައީސް އޮފީސް ހިމެނޭ ސަރަޙައްދުގައި އަޑު އުފުލާ ނުރުހުން ފާޅުކޮށްފައެވެ. އަދި އެކަމާގުޅިގެން މާލެ ސިޓީ ކައުންސިލްގެ ހެންވޭރު ހުޅަނގު ދާއިރާގެ ކައުންސިލް މެމްބަރު އަހުމަދު އައިފާން އާއި އިތުރު ބަޔަކު ވަނީ ހައްޔަރުކޮށްފައެވެ.

ރައީސް ޔާމީންގެ ޝަރީޢަތްތައް ދިގު ދެންމުމާއި، މަޖިލިސް ހުއްޓުވާފައި އޮތްއޮތުމާއި ގުޅިގެން ރައްޔިތުންގެ ހުރި ބޮޑެތި ކަންބޮޑުވުންތަކެއް ރައީސުލް ޖުމްހޫރިއްޔާ އާއި ހިއްސާކުރުމަށް އިދިކޮޅު ލީޑަރޝިޕުން މިއަދު ވަނީ ރައީސް އޮފީހަށް ވަޑައިގަންނަވާފައެވެ. އަދި އެ ފުރުޞަތު ސަރުކާރުން ދީފައި ނުވާ ކަމަށް ވިދާޅުވެ އިދިކޮޅު ފަރާތްތަކުން ވަނީ ޖޭއެސްސީ އަށްވެސް ވަޑައިގަންނަވާފައެވެ.