ރައީސް އިބްރާހީމް މުހައްމަދު ސޯލިހުގެ ސަރުކާރުން ދުބާއީގެ ކުންފުންޏެއްކަމަށްވާ ”އެގްޒެކިއުޓާޒް ޖެނެރަލް ޓްރޭޑިންގް“ އާ ހަވާލުކޮށްގެން ކޮވިޑު ދުވަސްވަރު ރާއްޖެއަށް 75 ވެންޓިލޭޓަރުގެ ހިޔާނާތުގެ މައްސަލައިގައި އާބިޓްރޭޝަނުގެ ހުކުމާ އެއްގޮތަށް ވެންޓިލޭޓަރުގެ ބަދަލު ނުލިބިދާނެކަމުގެ ބިރު އެބައޮތް ކަމަށް ބަންޑާރަނައިބު އަހުމަދު އުޝާމް ވިދާޅުވެއްޖެއެވެ.
އޭޖީ އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއެއް ކުރި ސުވާލަކަށް ޖަވާބު ދެއްވަމުން އުޝާމް ވިދާޅުވީ، ޝަރީއަތް ކުރިއަށް ގެންދިއުމަށް ދައްކަންޖެހޭ ފައިސާ ދައްކަން ޖެހޭނީ ސަރުކާރުން ކަމުގައެވެ.
”އާބިޓްރޭޝަނަށް ދެކޮޅުން ދައްކަން ޖެހޭ ފައިސާ ވެސް ދައްކަން ޖެހުނީ ސަރުކާރަށް“ އުޝާމް ވިދާޅުވިއެވެ.
75 ވެންޓިލޭޓަރުގެ ތެރެއިން ރާއްޖެއަށް ގެނެވިފައިވަނީ 15 ވެންޓިލޭޓަރެވެ. ބާކީހުރި ވެންޓީލޭޓަރުތަށްކަށް ވީގޮތެއް ނޭނގެއެވެ. އެ މައްސަލާގައ ި32 މިލިއަން ރުފިޔާގެ ހިޔާނާތުގެ ބޮޑު ތުހުމަތެއް ހެލްތު މިނިސްޓްރީގެ އިސް ބޭފުޅުންގެ މައްޗަށް ވަނީ ކޮށްފައެވެ.
