ހުރަވީ ބިލްޑިންގ ހުރި ބިމުގައި 226 ސައިކަލު ޕާކު ކުރެވޭނެ ޕާކިން ޒޯނެއް ހެދުމުގެ މަސައްކަތް ކުރަމުން ދާކަމަށް މާލެ ސިޓީ ކައުންސިލުން ހާމަކޮށްފި އެވެ.
މާލެ ސިޓީގެ މޭޔަރ ޑރ.މުހައްމަދު މުއިއްޒު އިއްޔެ ކުރެއްވި ޓްވީޓެއްގައި ވިދާޅުވީ އެ ޕާކިންގ ޒޯނުގައި 226 ސައިކަލު ޕާކު ކުރެވޭނެ ކަމުގައެވެ.
މި ޕާކިން ޒޯނު ހަދަނީ މީހުންނަށް އިށީންދެލައިގެންވެސް ތިބެވޭ ގޮތަށެވެ. އަދި މި ސަރަހައްދުގެ ލޭންޑް ސްކޭޕިން ރަނގަޅުކޮށް ޕާކިން ޒޯނު ނިމޭއިރު ހުރަވީ ބިލްޑިންގއާ ހުކުރު މިސްކިތާއި ދެމެދު މިހާރު އޮތް މަގަށް ދޮންވެލި ލާގޮތަށްވެސް ހަމަޖެހިފައި ވެއެވެ.
Kureege Huravee Building huri bimugai cycle parking zone kurehumuge masakkai @MaleCitymv in kuriyah gendhanee. Jumla 226 cycle park kureveyne. pic.twitter.com/ZZpJ90Cj27
— Dr Mohamed Muizzu (@MMuizzu) October 27, 2022
މީގެ އިތުރުން މި ޕާކިން ޒޯނުގައި މުޅިތަނަށް އަލިވާނެހެން އައުޓް ޑޯ ލައިޓިންގ ހަރުކޮށް އަދި ގަސް ބުރުތަކުގައި ގަސް އިންދައި، ރީތި ކުރުމަށް ވަނީ ހަމަޖެހި ފައެވެ.
މި ސަރަހައްދަކީ އަދިވެސް ސަރުކާރުގެ ގިނަ އޮފީސްތަކެއް ކުރި ހިސާބެއް ކަމުން މި ޕާކިން ޒޯންގެ ސަބަބުން ގިނަ ބަޔަކަށް ފަސޭހަތަކެއް ލިބޭނެ ކަމަށް ބެލެވެއެވެ. އެގޮތުން އައިޑީކާޑު އަދި ޕާސްޕޯޓް ފަދަ ކޮންމެހެން ބޭނުންވާ ހިދުމަތްތައް ހޯދުމަށް ވެލާނާގެއަށް ދާ ފަރާތްތަކަށް ޕާކު ކުރުމަށް މިހާރު ދިމާވާ ގިނަ ދަތިތަކަށް ލުޔެއް ލިބޭނެ އެވެ.
ހުރަވީ ބިލްޑިންގ އަކީ މި ފަހަކާ ޖެހެންދެން ސަރުކާރުގެ މުހިންމު އޮފީސްތަކެއް، ވަރަށް ގިނަ ދުވަސްތަކެއް ވަންދެން ހިންގި އިމާރާތެކެވެ. އެ ގޮތުން ޓްރާންސްޕޯޓް މިނިސްޓްރީއާ، އެޓަރނީ ޖެނެރަލްގެ އޮފީހާއި، އައިޑީކާޑު ޔުނިޓާ، އެންޓި-ކޮރަޕްޝަން ކޮމިޝަން ހިމެނެއެވެ. ނަމަވެސް އިމާރާތް ބާވެ، ކޮންކްރީޓް ސީޓުތަކުން ބައެއް ވެއްޓެން ފެށެމުން އެ އިމާރާތް ހުސްކޮށް ވަނީ ތަޅާލާފައެވެ.
