ލިވާތު ކުރިކަމުގެ ކުށަށް އިއުތިރާފުވެފައިވާ ބަންގްލަދޭޝްގެ އެމްޑީ އަލަމްގީރް 7 މަހާއި 6 ދުވަހަށް ޖަލަށް ލުމަށް ކްރިމިނަލް ކޯޓުން މިއަދު ހުކުމް ކޮށްފިއެވެ.
ކުށަށް އިއުތިރާފް ވުމުގެ ސަބަބުން އަލަމްގީރުގެ މައްޗަށް ޝަރީއަތް ކުރީ އަވަސްނިޔާގެ މައްސަލައެއްގެ ގޮތުގައެވެ. އޭނާގެ މައްޗަށް ދައުލަތުން ވަނީ ތިން ދައުވާއެއް ކޮށްފައެވެ.
މިއަދުގެ އަޑުއެހުމުގައި އަލަމްގީރަށް ތައުބާ ވަނީ ލައިދީފައެވެ.
އަލަމްގީރްގެ އިތުރުން އެ މައްސަލައިގައި ދައުވާކޮށްފައިވަނީ 3 ދިވެހިންނަށެވެ. އެއީ ކުރީގެ ރައީސް އަދި ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ ކޮއްކޮ، ގާނޫނީ ވަކީލް އަހުމަދު ނާޒިމް އަބްދުއްސައްތާރާއި ނޮޅިވަރަމް ދާއިރާގެ ކުރީގެ މެމްބަރު މުހައްމަދު ނަޝީދު (ކާނަލް) ގެ އިތުރުން ފުލުހުންގެ ޑީއީޑީ އޮފިސަރު އަބްދުއްރަހުމާން ރަފީއު (ދޮންދިގު) އެވެ.
