ޓެކްސީތަކުގައި ކެމެރާ ހަރުކުރަން ލާޒިމް ކޮށްފިއެވެ.
ޓެކްސީގެ ގަވައިދަށް އަލަށް ގެނެވުނު ބަދަލާއެކު މިހާރު ޓެކްސީތަކުގައި ޑޭޝް ކެމެރާ ހަރުކުރަން ލާޒިމެވެ. އެގޮތުން ޓެކްސީގެ ހިދުމަތްދޭ ހުރިހާ ވަގުތެއްގައި ކެމެރާ ރިކޯޑިންގައި ހުންނަން ޖެހެއެވެ. އަދި އަބަދުވެސް 7 ދުވަހުގެ ރެކޯޑިން ބަހައްޓަން ޖެހެއެވެ.
ކޮންމެ ޓެކްސީ ކާރެއްގައި ވެސް ދަތުރުތަކުގެ އަގު ލިސްޓު ފެންނަ ގޮތަށް ބެހެއްޓުމާއި ކާރުތަކުގެ އެއަކޮންޑިޝަން ބަރާބަރަށް ހުރުމަކީވެސް ޓެކްސީގެ ގަވައިދަށް އަލަށް ގެނެވުނު ބަދަލެކެވެ. އެކަމަކު ޓެކްސީގެ އޭސީއަށް މައްސަލައެއް ދިމާވެފައިވާ ހާލަތެއްގައި އެކަން ދަތުރު ކުރާ ފަރާތައް އެންގުމަށްފަހު ވައި ދައުރުވާގޮތަށް ބިއްލޫރިގަނޑު ތިރިކުރަން ޖެހެއެވެ.
އާ ގަވައިދަށް ”ޕްރައިވެޓް ހަޔަ“ ގެ ހިދުމަތް ދިނުމާ ބެހޭ ބައިވެސް ވަނީ އިތުރު ކޮށްފައެވެ.
