ރާއްޖޭގައި ފާހިޝް ޢަމަލުތައް އާންމުވަމުން ދާއިރު ސަރުކާރު ފެންނަނީ ކުޅިބަލާ މީހެއްގެ ސިފައިގައި: އުމަރު
ދިވެހިރާއްޖޭގައި ފާހިޝް ޢަމަލުތައް ގިނަވުމުގެ ސަބަބުން ބަލިތައް ފެތުރުމާއި ރޭޕް ގިނަވުމާއި، ހަށިވިއްކުމާއި، ކުޑަކުދިންނާއި މެދު ބަދު އަޚުލާގީ ޢަމަލު ހިންގުން ފަދަ ކަންކަން އާންމުވެ، މި ހުރިހާ ކަމެއް ފެންނަމުންދާއިރު، ސަރުކާރު ފެންނަނީ ކުޅިބަލާ މީހެއްގެ ސިފައިގައި ކަމަށް ކުރީގެ ހޯމް މިނިސްޓަރު ޢުމަރު ނަޞީރު ވިދާޅުވެއްޖެއެވެ.
ޢުމަރުގެ ފޭސްބުކްގައި ހިއްސާކުރެއްވި ޕޯސްޓެއްގައި ވިދާޅުވީ ލިވާތު ކުރުމަކީ ބޮޑުކަމެއް ނޫން ކަމަށް ދައްކާ، ރާއްޖޭގައި LGBT ފެތުރުމަށް މަސައްކަތްތަކެއް ކުރެވެމުންދާކަމަށެވެ.
އަދި މި މަސައްކަތުގައި، ރާއްޖޭގައި އެފަދަ އޮފީސް ޤާއިމް ކޮށްގެން ތިބެ މަސައްކަތްކުރާ ބައިނަލް އަޤްވާމީ ޖަމާއަތްތަކާ ރާއްޖެ ބައިވެރިވެފައިވާ ބައިނަލް އަޤްވާމީ ޖަމާއަތްތައްވެސް ހިމެނޭކަމަށް ޢުމަރު ތުހުމަތު ކުރައްވާފައިވެއެވެ.
މިއާއިއެކު ޢުމަރު ވިދާޅުވީ ރާއްޖޭގައި ޤާއިމް ކޮށްފައި ހުންނަ އޮފީހަކުން ނުވަތަ އެ އޮފީހުގައި ހުންނަ ފަރާތަކުން މިފަދަ ކަމަކަށް ހިތްވަރު ދީފިނަމަ އެ އޮފީހެއް ބަންދު ކުރަން ވާނެކަމަށާއި، އެ މީހަކު ފޮނުވާލަންވާނެ ކަމަށެވެ.
