ރާއްޖޭގައި ހިންގޭ އެންމެ ބިޔަ ބޯހިޔާވަހިކަމުގެ މަޝްރޫކަމަށްވާ ފުށިދިއްގަރުފަޅު ހިއްކުމުގެ މަޝްރޫއުގެ ތެރެއިން ރަސްމާލޭގައި 30،000 ހައުސިންގް ޔުނިޓު އަޅަން ނިންމައިފިއެވެ.
ވަޒީރު ޑރ. ޢަލީ ހައިދަރު ވިދާޅުވީ، ޗައިނާއާއިއެކު އެއްބަސްވުމަކަށް ގޮސްފައިވަނީ ރަސްމާލޭގައި 30،000 ހައުސިން ޔުނިޓު ތަރައްގީ ކުރުމަށް ކަމަށެވެ. އަދި އާންމުކޮށް ބޮޑެތި ހައުސިން މަޝްރޫތައް ކުރިޔަށް ދާހެން ފިޔަވަހިތަކަށް ބަހައިނުލައި މަޝްރޫއު ކުރިޔަށް ދާނެކަމަށާއި، އެ މަޝްރޫއު ކުރިއަށްދާނީ އެއްފަހަރާ ނިންމޭ ގޮތަށްކަމަށް ވަޒީރު މައުލޫމާތު ދެއްވިއެވެ.
ޗައިނާއާއިއެކު ވެވުނު އެއްބަސްވުންތަކުގައި ރަސްމާލެ ތަރައްގީ ކުރުމަށް އެހެނިހެން އެއްބަސްވުންތަކުގައި ވެސް ސޮއިކުރައްވާފައިވެއެވެ. އެގޮތުން ރަސްމާލެއަށް ބޭނުންވާ އަސާސީ އެހެނިހެން ހިދުމަތްތައް ގާއިމްކުރުމާއި ބެހޭ އެއްބަސްވުމެއްގައި ވެސް ސޮއިކުރައްވާފައިވެއެވެ. އޭގެ ތެރޭގައި ފެނާއި ނަރުދަމާގެ ހިދުމަތްތައް ހިމެނެއެވެ.
މިހާތަނަށް ރާއްޖޭގައި ކުރިއަށްދާ އެންމެ ބިޔަ ބިން ހިއްކުމުގެ މަޝްރޫގެ އިތުރުން އެންމެ ބޮޑު ބޯހިޔާވަހިކަމުގެ މަޝްރޫއަށް ރަސްމާލެ ހިއްކުމުގެ މަޝްރޫއު ވެގެން ދާއިރު އެކަމަށް ރައްޔިތުންގެ ފޮނި އުންމީދުތައް އަމާޒުވެއެވެ. ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވީ، ރަސްމާލެ ހިއްކައި ނިމި ގެދޮރު ދޫކުރެވުމުން ބޯހިޔާވަހިކަމަށް ޖެހިފައި އޮތް އޮތުން ނިމުމަކަށް އަންނާނެކަމަށެވެ.
