މާލެ ސިޓީ ކައުންސިލްގެ ”ކޮމިއުނިޓީ އެންގޭޖްމެންޓް ޔުނިޓް“ އިފްތިތާޙްކޮށްފިއެވެ.
މާލެ ސިޓީ ކައުންސިލްގެ ”ކޮމިޔުނިޓީ އެންގޭޖްމެންޓް ޔުނިޓް“ އަދި އެ ޔުނިޓްގެ މަސައްކަތް އިފްތިތާޙް ކޮށްދެއްވާފައިވަނީ މާލެ ސިޓީގެ މޭޔަރ ޑރ މުޙައްމަދު މުޢިއްޒުއެވެ.
މާލެ ސިޓީ ކައުންސިލުން އުފެއްދި ”ކޮމިޔުނިޓީ އެންގޭޖްމެންޓް ޔުނިޓް“ ގެ ބޭނުމަށް މާލެ ވަނީ 8 ޒޯނަކަށް ބަހާލައިފަ އެވެ. އެ ޕްރޮގްރާމްގައި 18 އަންހެނުންނާއި 60 ފިރިހެނުން މަސައްކަތް ކުރާނެ އެވެ. އެ ޔުނިޓްގެ ބެލެހެއްޓުމުގެ ކަންކަން ހަވާލުކޮށްފައި ވަނީ ކުރީގެ ޑެޕިއުޓީ ކޮމިޝަނަރު އޮފް ޕޮލިސް އަހުމަދު ސައުދީއާ އެވެ.
ޗަމްޕާ ސެންޓްރަލް ހޮޓަލުގައި ބޭއްވި މި ރަސްމިއްޔާތުގައި މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ، އެއީ ބޮޑު ޒިންމާއަކާއިއެކު އަލަށް ފަށާ ކަމެއް ކަމަށެވެ. އެއީ ކައުންސިލުގެ ހުރިހާ މެމްބަރުން ވަރަށް ބޮޑަށް އުންމީދު ކުރަމުން އައި ކަމެއް ކަމަށް ވެސް މޭޔަރު ވިދާޅުވި އެވެ.
”އަޅުގަނޑުމެންގެ ކައުންސިލަށް ދެ އަހަރު ފުރޭއިރު ވަރަށް ބޮޑު އުފަލެއް އެއީ އަޅުގަނޑުމެން ތަސައްވަރު ކުރި ޕްލޭންގަ އޮތް ގޮތަށް، ވަރަށް އުނދަގޫ ކަމެއް ނަމަވެސް ވަރަށް މުހިންމު ކަމެއް ހާސިލު ވާތީ“ މޭޔަރ ވިދާޅުވިއެވެ.
މޭޔަރ ވިދާޅުވީ ކޮމިޔުނިޓީ އެންގޭޖްމެންޓް ޔުނިޓްގެ މަސައްކަތަކީ ވަރަށް ބޮޑު ޒިންމާއެއް ކަމަށާއި މާލެ ސިޓީ ކައުންސިލުން މި ބިޔަބޮޑު މަސައްކަތް ފެށީ ސަރުކާރުން ދީފައިވާ ބަޖެޓުގެ ތެރެއިން އެކަން ކުރެވޭނެ ގޮތަށް ކަމާށެވެ. އަދި މި ކަމުގެ ސަބަބުން ގިނަ ދިވެހިން ތަކަކަށް ވަޒީފާ ލިބިގެން ގޮސްފައިވާ ކަމުގައި މޭޔަރ ވިދާޅުވިއެވެ.
މާލެ ސިޓީ ކައުންސިލް، ކޮމިއުނިޓީ އެންގޭޖްމެންޓް ޔުނިޓްގެ މަސައްކަތް އިފްތިތާހްކުރުމުގެ ރަސްމިއްޔާތުގައި މާލެ ސިޓީ މޭޔަރ ޑރ. މުޙައްމަދު މުޢިއްޒު ބައިވެރިވެ ވަޑައިގަންނަވަނީ. މިހަފްލާގައި ޔުނިޓުގެ ސުޕަވައިޒަރުންނާޢި އޮފިސަރުންނަށް ވަނީ ލިޔުން ހަވާލުކޮށްފައި. pic.twitter.com/B7JmAZ7rqa
— Malé City Council (@MaleCitymv) May 15, 2023
މި ރަސްމިއްޔާތުގައި ވާހަކަފުޅު ދައްކަވަމުން ކޮމިއުނިޓީ އެންގޭޖްމެންޓް ޔުނިޓްގެ އޮޕަރޭޝަންސް މެނޭޖަރު އަހުމަދު ސައުދީ ވިދާޅުވީ މާލެ ސިޓީ ކައުންސިލުން އަލަށް ފެށި މަސައްކަތުގެ ސަބަބުން މާލެ އަކީ ހުރިހާ އެންމެންނަށް ވެސް ހިތްފަސޭހަ، ހިތްހަމަ ޖެހޭ ތަނަށް ވާނެ ކަމުގެ ޔަގީންކަން އެބައޮތް ކަމަށެވެ.
ސައުދީ އިތުރަށް ވިދާޅުވީ މިއީ މުޅިން އަލަށް ފަށާ ކަމަކަމަށް ވުމުން ހައްލު ކުރަން ޖެހޭ ކަންކަމާއި ރަނގަޅު ކުރަން ޖެހޭ ކަންކަން ވެސް ހުންނާނެ ކަމަށެވެ. އަދި އާ ކަންކަމާ ކުރިމަތިލައްވައި، ކައުންސިލުން އަދާކުރުމަށް އަންގާފައިވާ މަސްއޫލިޔަތު އަދާކުރެއްވުމުގައި ދެމިހުންނާނެ ކަމަށެވެ.
ކޮމިއުނިޓީ އެންގޭޖްމެންޓް ޔުނިޓްގެ މުވައްޒަފުންނާ ހަވާލުކޮށްފައިވާ ބައެއް ޒިންމާތައް:
– މަގުމަތީގައި ކުނި ބަހައްޓާތޯ ބެލުން.
– ޕެލެޓް ބެހެއްޓުން.
– މުދަލާއި ތަކެތި މަގުމަތީގައި ގަވާއިދާ ހިލާފަށް ބަހައްޓާތޯ ބެލުން.
– ޕާކް ކުރުމުގެ މައްސަލަތައް.
– ޓްރެފިކް (ބާރުބޮޑު ވަގުތުތަކުގައި މަގުތައް ތޮއްޖެހުމުގެ މައްސަލަތައް ހައްލުކުރުން)
– އިމާރާތް ކުރާ ތަންތަނުގެ ސަލާމަތީ ކަންކަ ބެލެހެއްޓުން.
– ހިނގާ މީހުންގެ ބޮލަށް ގޭގެއިން ފެން ފޭބުން ހައްލުކުރުން.
މި މުވައްޒަފުންގެ އަސާސީ މުސާރައިގެ ގޮތުގައި 6000 ރުފިޔާ އަދި އެލަވަންސްގެ ގޮތުގައި 4000 ރުފިޔާ އާއިއެކު ޖުމްލަ މުސާރައިގެގޮތުގައި 10000 ރުފިޔާ ލިބޭނެއެވެ.
އަދި ސުޕަވައިޒަރުންނަށް އަސާސީ މުސާރައިގެ ގޮތުގައި 10000 ރުފިޔާ އަދި އެލަވަންސްގެ ގޮތުގައި 5000 ރުފިޔާ އާއިއެކު ޖުމްލަ 15000 ރުފިޔާ މުސާރައިގެ ގޮތުގައި ލިބޭނެއެވެ.
މާލެސިޓީ ކައުންސިލުން ފުލުހުންގެ ޚިދުމަތާއެކު އެއްބަސްވުމެއްގެ ދަށުން ޕޮލިސް ކޮންސްޓަބިއުލަރީގެ ޚިދުމަތް މީގެކުރިން ފެއްޓިނަމަވެސް ފުލުހުން އަމިއްލައަށް ކައުންސިލާއި މަޝްވަރާކުރުމެއްނެތި މިއެއްބަސްވުން އުވާލާފައިވާކަމަށް މޭޔަރ މުޢިއްޒު މީގެކުރިން ވިދާޅުވިއެވެ. މިއާއިއެކު މާލެސިޓީ ކައުންސިލުން ނިންމީ ”މަގުފާރަވެރިން“ ނުވަތަ ”ކޮމިޔުނިޓީ އެންގޭޖްމެންޓް ޔުނިޓް“ އުފައްދައިގެން މާލެސިޓީގެ މުނިސިޕަލް ޚިދުމަތްތައް ރަނގަޅުކުރުގެ މަސައްކަތް ކުރިއަށްގެންދާށެވެ.
