ކާފަރެއްގެ ޖަނާޒާގައި ބައިވެރިވުމަކީ ޝިރުކެއް: ޝައިޚް ނިޝާން

ކާފަރެއްގެ ޖަނާޒާގައި ބައިވެރިވުމަކީ ޝިރުކެއް ކަމަށް އައްޝައިޚް އާދަމް ނިޝާން ވިދާޅުވެއްޖެއެވެ.

ޝެއިހް ނިޝާން މިފަދައިން ޓްވީޓް ކުރައްވާފައިވާއިރު ދިވެހި ރާއްޖޭގެ ރައީސުލް ޖުމްހޫރިއްޔާ އިބްރާހިމް މުޙައްމަދު ސޯލިހު އާއި އަނބިކަނބަލުން ފަޒްނާ އަހުމަދު ވަނީ އިނގިރޭސި ރާނީގެ ޖަނާޒާގައި ބައިވެރިވެރިވުމަށް އިނގިރޭސި ވިލާތަށް މިއަދު ފުރާ ވަޑައިގަންނަވާފައެވެ.

ކާފަރުންގެ ޖަނާޒާގައި ބައިވެރިވުމާއި ގުޅޭގޮތުން ޝައިޚް ނިޝާން ކުރެއްވި ޓުވީޓެއްގައި ވިދާޅުވީ، ޖަނާޒާއަކީ އަޅުކަމެއް ކަމަށާއި އެހެންކަމުން ކާފަރެއްގެ ޖަނާޒާގައި، އޭނާގެ ދީނުގެ މީހުންކުރާ ކަންކަމުގައި (ދުޢާ ކުރުމާއި އެނޫންވެސް އެފަދަ ކަންކަމުގައި) ބައިވެރިވާ މީހާ އެ ބައިވެރިވަނީ އެމީހުންނާ އެކު ޝިރުކުގައި ކަމަށެވެ.

މީގެ އިތުރުން ނިޝާން ވިދާޅުވީ، ކާފަރުންގެ ޖަނާޒާގައި އެމީހުން ދުޢާކޮށް ހަދާނީ މާތް ރަސްކަލާނގެ ފިޔަވައި އެހެން ފަރާތްތަކަށް ކަމަށެވެ.

ޝައިޚް ނިޝާންގެ ޓްވީޓްގައި ވަނީ މިކަމާއި ގުޅޭގޮތުން ތައުބާ ސޫރަތުގެ 84 ވަނަ އާޔަތުގައި ބަޔާންވެގެންވާ ބަސްފުޅު މާނައާއިއެކު ހިއްސާ ކުރައްވާފައެވެ.

ޖަނާޒާއަކީ އަޅުކަމެކެވެ. އެހެންކަމުން ކާފަރެއްގެ ޖަނާޒާގައި، އޭނާގެ ދީނުގެ މީހުންކުރާ ކަންކަމުގައި (ދުޢާކުރުމާއި އެނޫންވެސް އެފަދަ ކަންކަމުގައި) ބައިވެރިވާ މީހާ އެބައިވެރިވަނީ އެމީހުންނާއިއެކީ އެޝިރުކުގައެވެ. އެހެނީ އެމީހުން ދުޢާކޮށް ހަދަނީ ﷲ ފިޔަވައި އެހެން ފަރާތްތަކަށެވެ. pic.twitter.com/AWmpJz5YDg

— Adam Nishan Ibn Ali Adam (@adamnishanali) September 15, 2022

ކާފަރެއްގެ ޖަނާޒާގައި ބައިވެރިވުމަށް ދިވެހި ސަރުކާރުގެ ވަފްދެއް އިނގިރޭސިވިލާތަށް ވަޑައިގެންނެވުމަށް ނިންމާފައިވާއިރު މިސަރުކާރުގެ ހޯމް މިނިސްޓަރު ޝައިޚް އިމްރާން ދާދިފަހުންވެސް ވިދާޅުވީ ރައީސް ސޯލިހު ކުރައްވަނީ ކީރިތި ގުރުއާނުގައި އަންގަވާފައިވާ ފަދަ، އަދި ކީރިތި ރަސޫލާ ކުރެއްވި ފަދަ ހެޔޮ ވެރިކަމެއްކަމަށެވެ.

ރައީސް ސޯލިހުގެ މި ދަތުރުފުޅަށް ބޮޑު ޚަރަދެއްހިނގާނެ ކަމަށް ބެލެވޭއިރު މިކަމާއި ގުޅިގެން ދީނީ ޢިލްމުވެރިންނާއި އާންމު ރައްޔިތުން ދަނީ ކަންބޮޑުވުން ފާޅުކުރަމުންނެވެ.

ކާފަރުންގެ މައްޗަށް ކަށުނަމާދު ނުކުރަން އަދި ހެޔޮދުޢާ ނުކުރަން އަންގަވާފައިވަނީވެސް ތައުބާގެނަމުން ނަން ދެވިފައިވާ ސޫރަތުގައި. ރަސޫލާވެރިކަން ކުރެއްވިގޮތައް ވެރިކަން ކުރައްވާ ރައީސް ޤްރުއާނުގައި ނައްސުން މަނާ ކުރައްވާފައިވަނިކޮށް މިއޮށްފުރީ ޝިރުކުގައި ބައިވެރިވާން.@ShimranAb pic.twitter.com/8VQKqzIxvy

— ibrahimjanab🇲🇻 (@ibrahimjanab) September 15, 2022

ރައީސްގެ ދަތުރުފުޅާއި ގުޅޭގޮތުން ރައީސް އޮފީހުގެ ތަރުޖަމާނު މިއުވާން ވިދާޅުވީ ރައީސްގެ ދަތުރުފުޅަށް މިލިއަނެއްވެސް ނާރާނެ ކަމަށާއި، މި ދަތުރުފުޅަކީ އެގައުމުގެ ދައުވަތަކަށް ރައީސް ސޯލިހު ކުރައްވާ ދަތުރުފުޅެއްކަމަށެވެ.