”ގެދޮރުވެރިޔާ“ ސްކީމުގެ ދަށުން ދޫކުރާ 4،000 ފްލެޓަށް މާކްސް ދިން ގޮތާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން ކުރަމުންދާ ތަހުގީގު ނިންމުމަށް މަސައްކަތް ކުރަމުންދާ ކަމަށް އެ ކޮމިޝަނުން ބުނެފިއެވެ.
ފްލެޓު މައްސަލާގައި މިދިޔަ އަހަރުގެ ނޮވެންބަރު މަހު މިނިވަން މުއައްސަސާތަކާ ބެހޭ ކޮމިޓީއަށް އޭސީސީ ހާޒިރުކޮށް ސުވާލު ކުރުމުން އެ ކޮމިޝަނުން ވަނީ، ގެދޮރުވެރިޔާ ޕޯޓަލް މެދުވެރިކޮށް ފުލެޓަށް އެދުނު މީހުންގެ ތެރެއިން އެ ޕޯޓަލްއިން އޮޓޯއިން ޕޮއިންޓު ދިނުމުން ޝަރުތު ހަމަނުވާ މީހުންނަށް ލިބުނު ޕޮއިންޓު ބަދަލުކޮށް ފުލެޓު ދީފައިވާކަން ފާހަގަކުރެވިފައި ކަމަށް ބުނެފައެވެ.
ހައުސިން މިނިސްޓްރީގެ ގެދޮރުވެރިޔާ ޕޯޓަލަށް ހުރިހާ ލިޔެކިޔުންތައް އަޕްލޯޑުކުރުމުން، ލިޔެކިޔުންތަކާއި ހުށަހަޅާފައިވާ މައުލޫމާތު ވަޒަންކޮށް އޮޓޯއިން މާކުސް ޖެނެރޭޓުކުރެއެވެ.
ކޮމިޓީ ބައްދަލުވުމުގައި އޭސީސީގެ ނައިބުރައީސް ޢަބްދުއްސަލާމް ވިދާޅުވެފައިވާ ގޮތުގައި އެ ޕޯޓަލްއިން ޖެނެރޭޓުކުރާ ޕޮއިންޓު އެޕްރޫވުކުރުމަށް ނުވަތަ އެ އެޕްރޫވުކުރުން ޕްރޮސެސްކުރަން ތިއްބެވި ބޭފުޅުން އެ މާކުސްތަކަށް ހުރީ ބަދަލު ގެނެސްފައެވެ.
އަދި ޕޯޓަލްއަށް ހުށަހަޅާފައިވާ ލިޔުންތަކުން އެމީހަކީ މާލޭގައި ދިރިނޫޅޭ މީހެއްކަން ކަށަވަރުވާ އިރުވެސް ގިނަ މާކުސް ދިނުމަށްފަހު އެފަދަ މީހުންނަށް ވެސް ފުލެޓު ދީފައި ހުރިކަން ފާހަގަކުރެވުނު ކަމަށް އޭނާ ވިދާޅުވެފައިވެއެވެ.