ހޯމް މިނިސްޓްރީން ޕޮލިސް ބޯޑުގެ އެންގުންތަކަށް ނުކިޔަމަންތެރިވާ މައްސަލަ ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ (241 ކޮމިޓީ)އަށް ހުށަހަޅައިފިއެވެ.
މި ކޮމިޓީން ބޭއްވި ބައްދަލުވުމެއްގައި ކޮމިޓީގެ މުގައްރިރު ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވީ ދިވެހި ފުލުހުންގެ ގާނޫނުގެ ދަށުން ހަދާ ގަވާއިދުތަކާ ބެހޭ ގޮތުން ޕޮލިސް ބޯޑުން ކޮމިޓީއަށް މައްސަލައެއް ހުށަހަޅާފައިވާ ކަމަށެވެ.
އަސްލަމް ވިދާޅުވީ ޕޮލިސް ބޯޑުގެ ޝަކުވާއަކީ އެ ބޯޑުން އަންގާ ކަންކަމަށް ހޯމް މިނިސްޓްރީން ނުކިޔަމަންތެރިވާ މައްސަލައެވެ.
ދިވެހި ފުލުހުންގެ ގާނޫނުގައި ބުނެފައިވާ ގޮތުން، ފުލުހުންގެ ކަންކަން ބަލަހައްޓާ އެންމެ އިސް ފަރާތަކީ ޕޮލިސް ބޯޑު ކަމަށްވާއިރު ފުލުހުންގެ ކަންކަމާމެދު އެ ބޯޑަށް ޖަވާބުދާރީވެ ވަޑައިގަންނަވަން ޖެހިވަޑައިގަންނަވާނީ ސީދާ ކޮމިޝަނަރ އޮފް ޕޮލިސް އެވެ.
ނިމިދިޔަ ފަސް އަހަރު ހޯމް މިނިސްޓްރީގެ އިހްމާލު އޮތް އެތައް މައްސަލަތަކެއް ފެންމަތިވެފައިވާއިރު، އެކަމާ މާބޮޑު ސަމާލުކަމެއް ހޯމް މިނިސްޓަރު އިމްރާން އަބްދުﷲ ދެއްވާފައި ނުވާތީ ގިނަ ބަޔަކު ދަނީ އެބޭފުޅާއަށް ފާޑު ކިޔުންތައް އަމާޒު ކުރަމުންނެވެ.