ގެދޮރުވެރިޔާ ސްކީމުގެ ފްލެޓްތަކަށް ޝަރުތު ހަމަވެ، އެއްވެސް އިތުރު މައްސަލައެއް ނެތް މީހުންގެ ނަންތައް ހިމެނޭ ލިސްޓެއް އެންޓި-ކޮރަޕްޝަން ކޮމިޝަން (އޭސީސީ) އިން ހައުސިން މިނިސްޓްރީއަށް ފޮނުވައިފިއެވެ.
އޭސީސީން ފޮނުވާފައިވާ ލިސްޓުގައި ހިމެނޭ ފޯމުތަކަކީ ހަމައެކަނި ތަހްގީގުގެ ބޭނުމަށް ހޯދާފައިވާ މައުލޫމާތުގެ މައްޗަށް ބިނާކޮށް އެކުލަވާލާފައިވާ ލިސްޓެއް ކަމުގައިވާތީ ގެދޮރުވެރިޔާ ސްކީމުގެ ދަށުން ފްލެޓު ލިބޭ ފަރާތްތައް ކަނޑައެޅުމުގެ އިންތިޒާމުތައް އެ މިނިސްޓްރީން ކުރަމުން ދާކަމަށް ވެސް އެ މިނިސްޓްރީން ވަނީ ބުނެފައެވެ.
ކުރީ ސަރުކާރުން މާލެ ސަރަހައްދުގައި 4،000 ހައުސިން ޔުނިޓުގެ މަސައްކަތް ފެށުމަށް ފަހު ރިޔާސީ އިންތިޚާބާ ދިމާކޮށް ހުޅުވައިލި ގެދޮރުވެރިޔާ ސްކީމުގެ ދަށުން 9،000 އެއްހައި ފުލެޓު ދޫކުރަން ލިސްޓެއް އެކުލަވައިލާ އާންމުކުރިއެވެ.
އެ ލިސްޓުގެ ތެރެއިން މިހާރު ބިނާ ކުރަމުންދާ 4،000 ފުލެޓު ލިބޭނެ ފަރާތްތައް ކަނޑައަޅައި އިއުލާނުކުރީ ރިޔާސީ އިންތިޚާބު ނިމުމަށްފަހު އިންތިޤާލީ މަރުހަލާގައެވެ.