މަސް ރައްކާކުރާ ސްޓޯރޭޖު ކެޕޭސިޓީއާއި އައިސްގެ މައްސަލައަށް ކުރިއަށް އޮތް 18 މަސް ދުވަސްތެރޭ ހައްލެސް ގެންނާނެކަމަށް މަސްވެރިކަމާއި ބެހޭ ވުޒާރާގެ ވަޒީރު އަހްމަދު ޝިޔާމް ވިދާޅުވެއްޖެއެވެ.
”އަޅުގަނޑު ދަންނަވައިފިން ކުރިއަށް އޮތް 18 މަސް ދުވަހުގެ ތެރޭ އަޅުގަނޑުމެން ބޭނުންވަނީ ދިވެހިރާއްޖޭގެ މަހުގެ ސްޓޯރޭޖުގައި ހުރި ހުރިހާ މައްސަލައެއް އެއްކޮށް ހައްލުކުރަން. “ ޝިޔާމް ވިދާޅުވިއެވެ.
މަސްވެރިކަމުގެ ސިނާއަތު މިހާރު އޮތް މިންވަރަށްވުރެ ފުޅާކުރުމުގެ ގޮތުން މަސް ބަންދުކުރާ ކާރުޚާނާތަކާއި، މަސް ރައްކާކުރާ ވަސީލަތްތަކާއި އައިސް ޕުލާންޓުތައް އިތުރުކުރުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ރިޔާސީ ވައުދުފުޅެކެވެ.
އޭގެ އިތުރަށް އެމަނިކުފާނުގެ ވެރިކަމުގެ ފުރަތަމަ 100 ދުވަހުގެ ތެރޭގައި މަސްވެރިންނަށް ކުރިމަތިވެފައި ހުރި ދަތިތައް ހައްލުކުރެއްވުމުގެ ގޮތުން މަސްވެރިންގެ ދަފުތަރެއް އެކުލަވައިލާ، މަސްވެރިކަމަކީ ވަޒީފާއެއްކަމަށް ބަލައި، މާލީ އިދާރާތަކުން އެހެނިހެން ވަޒީފާތައް އަދާކުރާ މީހުންނަށް ލިބޭ ޚިދުމަތްތައް މަސްވެރިންނަށް ލިބޭނެ އިންތިޒާމު ހަމަޖައްސަވާ ދެއްވާނެކަމަށް ވަނީ ވިދާޅުވެފައެވެ.
