ޔޯގާ ހުއްޓުވުމުން އެމްޑީއެން ހޭލައިފި!

އިންޓަނޭޝަނަލް ޔޯގާ ޑޭ ފާހަގަކުރުމުގެ ގޮތުން އިންޑިއާ ހައި ކޮމިޝަނާއި އިންޑިއަން ކަލްޗަރަލް ސެންޓަރު އަދި ޔޫތު މިނިސްޓްރީ އިން އިއްޔެ ހެނދުނު ކުރިއަށްގެންދިޔަ ޔޯގާ ޑޭ ހަރަކާތް ޒުވާނުން ނުކުމެ ހުއްޓުވުމާއި ގުޅިގެން އެކަމާމެދު ނުރުހުން ފާޅުކޮށް މޯލްޑިވްސް ޑިމޮކްރެސީ ނެޓްވޯކް (އެމްޑީއެން) އިން ބަޔާނެއް ނެރެފިއެވެ.

އެމްޑީއެންގެ މި ބަޔާނުގައި ބުނެފައިވަނީ މިއަދު ގަލޮޅު ދަނޑުގައި ހިނގާދިޔަ ހާދިސާއަކީ ރާވައިގެން ހިންގި“ނިރުބަވެރި ހަމަލާއެއް” ކަމަށެވެ. އަދި މިއީ އެޖަމުއިއްޔާއިން 2019 ވަނަ އަހަރު ނެރުނު “ލާދީނީ” ރިޕޯޓުގައި ބަޔާންކޮށްފައި ހުރި ކަންކަން ގަބޫލު ނުކުރުމުގެ ނަތީޖާ ކަމަށް ވަނީ ބުނެފައެވެ.

މީގެ އިތުރުން އެ ބަޔާނުގައި ބުނެފައިވަނީ، މިއަދު ހިނގާދިޔަ ހާދިސާއަކީ ހައްދުފަހަނައެޅުން ކަމަށާއި، އަދި މިއީ އިސްލާމްދީން ފަތުރާ ޖަމާއަތްތަކަށް ސަރުކާރުން ފުރުސަތު ދިނުމުން ނުކުންނަ ނަތީޖާ ކަމަށެވެ. މީގެ އިތުރުން އެމްޑިއެންއިން މި ބަޔާނުގައިވަނީ މިކަމާ ގުޅިގެން ރާއްޖެއާއި މެދު ފިޔަވަޅު އެޅުމަށް ބައިނަލްއަޤްވާމީ މުޖުތަމައަށް ގޮވާލާފައެވެ.

2019 ވަނަ އަހަރު އިސްލާމްދީނާ ދެކޮޅަށް ނެރުނު ރިޕޯޓަކާއެކު އާންމުންގެ ތެރޭގައު މަޝްހޫރުވި އެމްޑީއެންއިން އަބަދުވެސް ދަނީ ފުޅާ ދާއިރާއެއްގައި ރާއްޖޭގެ އިސްލާމީ ވަހުދަތަށް ގޮންޖަހަމުންނެވެ. އަދި އެޖަމިއްޔާ އުފެދުނީއްސުރެ ދަނީ އިސްލާމްދީނަކީ ހައްދުފަހަނަ އަޅާފައިވާ ދީނެއް ކަމަށް ވަކާލާތުކޮށް، ރާއްޖޭގައި ދީނީ މިނިވަންކަމަށް ހުއްދަ ދިނުމަށް ބާރު އަޅަމުންނެވެ.