ޗީފް އޮޕް ޑިފެންސް ފޯސް މޭޖަރ ޖެނެރަލް ޝަމާލު ސިޔާސީ މަސައްކަތުގައި ރައީސް އިބްރާހިމް މުހައްމަދު ސޯލިހާއިއެކު ހަރަކާތްރިވާން ފަށައިފިއެވެ.
ރައީސް ސޯލިހު މިހާރު ރާއްޖޭގެ އެކި ކަންކޮޅުތަކަށް ކުރަމުންދާ ނުރަސްމީ ދަތުރު ތަކުގައި މޭޖަރ ޝަމާލް ދަނީ ބައިވެރިވެ ވަޑައިގަންނަވަމުންނެވެ. މި ބައްދަލުވުންތަކަކީ 2023 ގެ އިންތިހާބަށް ތައްޔާރުވުމަށް، ކޯލިޝަން ލީޑަރުންނާއި ބައްދަލުކުރުމަށް ކުރާ ދަތުރުތަކެކެވެ.
މޭޖަރ ޝަމާލްގެ މި އަމަލަކީ ސިފައިންގެ ޕްރޮޓޮކޯލްއާއި ކަނަޑައެޅިގެން ހިލާފު އަމަލެކެވެ. އަދި ސިފައިންގެ އެއްވެސް ރޭންކެއްގެ ބޭފުޅެއްގެ ފަރާތުން މިފަދަ ދަށު ދަރަޖައިގެ އަމަލެއް ސިފައިންގޭގެ ދިގު ތާރީހުގައިވެސް ހިންގިތަނެއް ފެނިފައެއް ނުވެއެވެ. މިކަމާ ގުޅިގެން ގިނަ ބައެއްގެ ފާޑުކިޔުން ވަނީ މޭޖަރ ޝަމާލްއަށް އަމާޒުވެފައެވެ.
އެގޮތުން ޕީޕީއެމްގެ ނައިބު ރައީސް އަދި ނައިފަރު ދާއިރާގެ އިއްޒަތްތެރި މެންބަރު އަޙްމަދު ޝިޔާމްވެސް ވަނީ މިކަމާމެދު ކަން ބޮޑުވުން ފާޅުކުރައްވާފައެވެ.
MDP ge emme isveriyaa ge haisiyyathun @ibusolih sarukaaru coalitiongai himeney JP ge Leader @qasimibrahim aa eku kuriyah gendhiya siyaasee bahdhaluvumugai @CDFofMNDF Shamaal baiverivumakee MNDF ah ves huthuru amale. Muassasaa ge qadharaa karaamaaiy mimeehun gelluvaalaifi. pic.twitter.com/6hSQBgoxeM
— Ahmed Shiyam (@Shiyamaldives) June 10, 2022
ޝިޔާމް ކުރެއްވި ޓްވީޓެއްގައި ވިދާޅުވީ، މިއީ އެމްއެންޑީއެފަށްވެސް ހުތުރު އަމަލެއް ކަމަށެވެ. އަދު މޭޖަރ ޝަމާލް ވަނީ އެމްއެންޑީއެފްގެ ގަދަރާއި ކަރާމާތް ނަގާލާފައި ކަމަށް ޝިޔާމް ވިދާޅުވިއެވެ.
ސިފައިންގެ ގާނޫނާއި ސިފައިންގެ ކޯޑް އޮފް އެތިކްސް އާއި ސިފައިންގެ ކޯޑް އޮފް ކޮންޑަކްޓް ބުނާ ގޮތުން ސިފައިން ސިޔާސީ ކަންކަމުގައި ބައިވެރިވުމަކީ މަނާ ކަމެކެވެ. މިކަމާ ގުޅިގެން މޭޖަރ ޝަމާލްއާއި މެދު އެއްވެސް ފިޔަވަޅެއް އަޅަން ނިންމާފައިވާކަމެއް ނުވަތަ ނޫންކަމެއް އަދި ސާފެއް ނުވެއެވެ.
