އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް ވިލިމާލެއިން ހޫނު މަރުހަބާއެއް ކިޔައިފިއެވެ.
ރައީސް ޔާމީން ވިލިމާލެއަށް ވަޑައިގެންނެވީ، ވިލިމާލެ ދާއިރާގެ އަންހެނުންގެ ތަރައްގީއަށް މަސައްކަތް ކުރާ ކޮމެޓީ (އ.ތ.މ.ކ) އަށް ވާދަކުރައްވާ ޕީޕީއެމްގެ ކެނޑިޑޭޓު ފާތިމަތު ނާޒިމާގެ ހާއްސަ ކެމްޕެއިން ޖަލްސާގައި ބައިވެވެރިވެވަޑައިގަތުމަށެވެ.
ޕީޕީއެމްގެ ތަރުޖަމާނު ހީނާ ވަލީދު ވިދާޅުވިގޮތުގައި ވިލިމާލޭގައި އޮންނަ މި ޖަލްސާ ޗެނަލް 13 އިން ލައިވްކޮށް ގެނެސްދޭނެއެވެ.
ވިލިމާލެ ދާއިރާގެ އ.ތ.މ.ކ ގެ ގޮނޑި ހުސްވީ އެ މަގާމުގައި ކުރިން ހުންނެވި އައިމިނަތު އީމާން އެކްސިޑެންޓެއްގައި ނިޔާވުމާ ގުޅިގެންނެވެ. ޕީޕީއެމްގެ ކެނޑިޑޭޓު ނާޒިމާގެ އިތުރުން މި ގޮނޑިއަށް ދެން ވާދަކުރައްވަނީ އެމްއެންޕީގެ ކެނޑިޑޭޓެކެވެ.
