އެމްޑީޕީގެ ޕާލަމެންޓްރީ ގްރޫޕްގެ މިހާރުގެ ލީޑަރު އަލީ އާޒިމް، 15 ވޯޓުގެ ތަފާތުން ބަލިކޮށް، އެ ގުރޫޕްގެ އާ ލީޑަރަކަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް މިއަދު އިންތިހާބުކޮށްފި އެވެ.
65 މެންބަރުން ތިއްބައްވާ ޕާލަމެންޓްރީ ގުރޫޕްގެ 40 ބޭފުޅުންގެ ވޯޓް އަސްލަމް ވަނީ ހޯއްދަވާފައެވެ. އާޒިމަށް ލިބުނީ އެންމެ 25 ވޯޓެވެ.
އަސްލަމަކީ ރައްޔިތުންގެ މަޖިލީހުގައި އެމްޑީޕީ ތަމްސީލު ކުރައްވާ މެމްބަރުންގެ ތެރެއިން މެދުނުކެނޑި އެންމެ ގިނަ ދުވަސް ވަންދެން މެމްބަރުކަން ކުރައްވާ ދެވަނަ ބޭފުޅާ އެވެ.
