ކެންސަރު ބައްޔަށް ފަރުވާ ކުރަމުން ދަނިކޮށް ރައްޔިތުންގެ މަޖިލީހުގެ ކޮމަންށޫ ދާއިރާގެ އެމްޑީޕީގެ މެންބަރު ހުސެއިން ވަހީދު ނިޔާވެއްޖެ އެވެ.
މެންބަރު ހުސެއިން ވަހީދު ނިޔާވެފައިވަނީ އޭޑީކޭ ހޮސްޕިޓަލުގައި ފަރުވާ ހޯއްދަވަމުން ދަނިކޮށް ރޭ ދަންވަރުގެ ވަގުތެއްގައެވެ.
ހުސެއިން ނިޔާވުމާ ގުޅިގެން އެމްޑީޕީގެ ޕާލިމެންޓް ގްރޫޕުގެ ލީޑަރު އަދި މެދު ހެންވޭރު ދާއިރާގެ މެންބަރު އަލީ އާޒިމް ކުރެއްވި ޓުވީޓެއްގައި ވިދާޅުވީ އެބޭފުޅާ 17 އަދި 19 ވަނަ ރައްޔިތުންގެ މަޖިލީހުގައި ގިނަގުނަ މަސައްކަތްތަކެއް ކުރެއްވި ކަމުގައެވެ. އަދި ހުސެއިން ނިޔާވި ހަބަރު އަޑުއެހީ ވަރަށް އަސަރާ ފުން ހިތާމަޔާއެކު ކަން އާޒިމް ފާހަގަކުރެއްވިއެވެ.
މެންބަރު ހުަސެއިން ވަހީދަކީ 17 އަދި 19 ވަނަ ރައްޔިތުންގެ މަޖްލީހުގައި ގިނަގުނަ މަސައްކަތްތަކެއް ކުރެއްވި ބޭފުޅެއް. ހުސެއިން ވަހީދު ނިޔާވި ޙަބަރު އަޑުއެހީ ވަރަށް އަސަރާ ފުން ހިތާމަޔާއެކު. ހުސެއިން ވަހީދައް ސުވަރުގެ މިންވަރު ކުރައްވާ އާއިލާއަށް ކެތްތެރިކަން ދެއްވާށިއެވެ. އާމީން
— 𝐀𝐥𝐢 𝐀𝐳𝐢𝐦 (@aliaazim) December 13, 2021
”ހުސެއިން ވަހީދައް ސުވަރުގެ މިންވަރު ކުރައްވާ އާއިލާއަށް ކެތްތެރިކަން ދެއްވާށިއެވެ. އާމީން.“ އަލީ އާޒިމް ވިދާޅުވިއެވެ.
އަލީ އާޒިމްގެ އިތުރުން ރައްޔިތުންގެ މަޖިލީހުގެ އެކި ސިޔާސީ ޕާޓީތަކަށް ނިސްބަތްވާ މެންބަރުން އަންނަނީ މެންބަރު ހުސެއިންގެ އާއިލާއަށް ތައުޒިޔާ ފޮނުވަމުންނެވެ.
”ބޮންތި“ އަށް މައުލޫމާތު ލިބުނު ގޮތުގައި ހުސެއިން ނިޔާވިއިރު އަނބިކަނބަލަކާ 3 ކުދިން ދުނިޔޭގައި އެބަ ތިއްބެވެ.
