މެދުޒިޔާރަތުގައި ދިދަ ނެގުމަކީ ސަގާފީ ކަމެއް، އެއީ ދީނީ ކަމެއް ނޫން: ޔުމްނާ

ތިރީސް އަހަރުގެ މެދުކެނޑުމަކަށް ފަހު މެދު ޒިޔާރާތުގައި އަލުން ބޮޑު ދިދަ ނެގުމުން ދީނީ އިލްމުވެރިންގެ ފާޑުކިޔުން ވަނީ އަމާޒުވެފައެވެ.

އެގޮތުން ޒިޔާރަތަށް ނަދުރު ބުނުމާއި އެކަމަށް މަގުފަހިވާފަދަ ކޮންމެ ކަމަކީ ޝިރްކުގެ އަމަލެއް ކަމަށް ބައެއް އިލްމުވެރިން ވަނީ ބުނެފައެވެ. އަދި މިކަމާ މެދު ފިޔަވަޅު އެޅުމަށް ބައެއް އިލްމުވެރިން ވަނީ އިސްލާމިކް މިނިސްޓްރީ އަށް ގޮވާލާފައެވެ.

އިލްމުވެރިންގެ ފާޑުކިޔުންތަކާއެކު މެދުޒިޔާރަތުގައި ނެގި ދިދަ މިހާރު ވަނީ ބާލާފައެވެ.

ހެރިޓޭޖް މިނިސްޓަރު ޔުމްނާ ކުރެއްވި ޓްވީޓެއްގައި ވިދާޅުވީ މެދު ޒިޔާރަތް ފަދަ އާސާރީ ބިނާތަކުގެ އާބާތުރަފިލުވައި ޖުމްހޫރީ ދުވަސް ފަދަ ގައުމީ މުނާސަބަތުތަކުގައި އެ ތަންތަނުގައި ދިދަ ނެގުމަކީ ދިވެހީންގެ ސަގާފަތް ދިރުވައި ގައުމީ ޖޯޝު އުފެދިގެންދާނެ ކަމެއް ކަމަށެވެ.

މިއީ އެއްވެސް ގޮތަކަށް ދީނީ ކަމެއްގެ ގޮތުގައި ކުރާ ކަމެއް ނޫން. ސަގާފީ ކަމެއް. pic.twitter.com/e7nFxWwY0e

— Yumna Maumoon 🇲🇻 🤝🇵🇸 (@yumna_maumoon) November 11, 2022

މެދުޒިޔާރަތަކީ ރާއްޖޭގެ ރަސްގެފާނު އެބޭކަލެއްގެ އަތްޕުޅު މައްޗަށް އިސްލާމްވެ ވަޑައިގެންނެވި އަބުލް ބަރަކާތު ޔޫސުފުލް ބަރުބަރީގެ ހަށިކޮޅު ފަސްދާނުލެވިފައިވާ ތަނެވެ.

”މިއީ އެއްވެސް ގޮތަކަށް ދީނީ ކަމެއްގެ ގޮތުގައި ކުރާ ކަމެއް ނޫން. ސަގާފީ ކަމެއް.“ ޔުމްނާ ވިދާޅުވިއެވެ.

ޖުމްހޫރީ ދުވަސް ގައުމީ ދުވަސް އަދި އީދު ދުވަސް ކަހަލަ ހާއްސަ ދުވަސްތަކަށް މިސަރުކާރުން މާބޮޑު ސަމާލުކަމެއް ނުދޭކަމަށް ގިނަ ދިވެހި ރައްޔިތުން އަންނަނީ ބުނަމުންނެވެ. ދާދިފަހުން އައި 3 ނޮވެންބަރު ނުވަތަ ނަސްރުގެ ދުވަސް ސަރުކާރުން ފާހަގަ ނުކުރުމަކީ މިގައުމުގެ މުހިންމު ދުވަސްތައް ފަނޑުވަމުން ދާކަމުގެ މިސާލެކެވެ.