ގައުމީ ޔުނިވަރސިޓީގައި މިހާރު ފަތުރަން އުޅެނީ ގާނޫނު އަސާސީއާ ހިލާފް ވިސްނުންތަކެއް ކަމަށް ކުރީގެ ނައިބު ރައީސް ޑރ.މުހައްމަދު ޖަމީލް އަހުމަދު ވިދާޅުވެއްޖެއެވެ.
ޑރ.ޖަމީލް ކުރެއްވި ޓުވީޓެއްގައި ވިދާޅުވީ ޔުނިވަރސިޓީތަކަކީ އިލްމީ، ގާނޫނީ އަދި އިޖުތިމާއީ ވިސްނުން ފުޅާކުރަން ދަސްކޮށްދޭންޖެހޭ ތަންތަން ކަމުގައެވެ.
”ޔުނިވަރސިޓީއިން މުވައްޒަފުންނާއި ދަރިވަރުންގެ ވިސްނުން އަޅުވެތިކުރުމަކީ ޣައިރުގާނޫނީ ކަމެއް.“ ޖަމީލް ވިދާޅުވިއެވެ.
ޤައުމީ ޔުނިވަރސިޓީގައި މިހާރު ފަތުރަން އުޅެނީ ޤާނޫނުއަސާސީއާ ޚިލާފް ވިސްނުންތައް. ޔުނިވަރސިޓީތަކަކީ ޢިލްމީ، ޤާނޫނީ އަދި ޢިޖްތިމާޢީ ވިސްނުން ފުޅާކުރަން ދަސްކޮށްދޭންޖެހޭ ތަންތަން. ޔުނިވަރސިޓީއިން މުވައްޒަފުންނާއި ދަރިވަރުންގެ ވިސްނުން އަޅުވެތިކުރުމަކީ ޣައިރުޤާނޫނީ ކަމެއް. https://t.co/NL9ltaep95
— Mohamed Jameel Ahmed (@MJameelAhmed) August 15, 2021
ގައުމީ ޔުނިވާސިޓީގެ މުވައްޒަފުން ސަރުކާރާއި ދެކޮޅަށް ހިޔާލުފާޅުކުރުން މަނާ ކަމެއްގެ ގޮތުގައި އެ ޔުނިވާސިޓީ އިން ވަނީ ކަނޑައަޅާފައެވެ.
އެގޮތަށް ނިންމާފައިވަނީ ގައުމީ ޔުނިވާސިޓީ ކައުންސިލްގެ 298 ވަނަ ޖަލްސާގައެވެ. އެ ޖަލްސާގައި މުވައްޒަފުން މީސްމީޑިޔާ ބޭނުން ކުރުމުގައި އަމަލު ކުރަން ޖެހޭނެ އުސޫލެއް ކައުންސިލްގެ އިއްތިފާގުން ފާސްކުރިއެވެ.
އެ އުސޫލުގައިވާގޮތުން ރައްޔިތުން ހޮވާފައިވާ ސިޔާސީ މަގާމެއްގައި ހުރި މީހަކަށް ނުވަތަ ރައީސުލްޖުމްހޫރިއްޔާ އައްޔަނުކުރާ މަގާމެއްގައި ހުރި މީހަކާ މެދު ރުޅިވެރިކަން އުފެދޭ ކަހަލަ ޝުއޫރެއް މީސްމީޑިޔާގައި ހާމައެއް ނުކުރެވޭނެއެވެ.
