މާލޭގެ އެއްވެސް ތަނެއްގައި ހުއްދައާ ނުލައި ޕޯސްޓަރު ނުހިއްޕޭ ގޮތް ހެދުމަށް މަސައްކަތް ކުރަމުން އަންނަ ކަމަށާއި ޕޯސްޓަރު ހިއްޕޭނޭ ވަކި ތަންތަން ސިޓީ ކައުންސިލުން ފާހަގަކޮށް އެކަން ވަކި ޕްރޮޖެކްޓެއްގެ ގޮތުގައި ކުރިއަށް ގެންދިއުމުގެ މަސައްކަތް ކުރަމުން އަންނަ ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
ސްޓެލްކޯގެ ”ޗާލުވެށި މަގޭ ޒިންމާ“ މަޝްރޫއު އިފުތިތާހުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން އާޒިމް ވަނީ ސްޓެލްކޯގެ ކަރަންޓު ފޮށިތަކުގައި ސިޔާސީ ޕޯސްޓަރުތައް ހަރުކުރާކަން ފާހަގަކުރައްވައި އެކަން ނުކުރުމަށް އިލްތިމާސްކުރައްވައިފައެވެ.
”އާންމުކޮށް ހަމަ ސިޔާސީ އެންމެންގެ ފޮޓޯތައް އެހެރީ ގާތްގަނޑަކަށް ހިއްޕިފައި މިހާރު އެ އެއްޗެހީގައި އެހުރީ. އަނެއްކާވެސް ކޮންމެ ކެމްޕެއިނެއްގެ ތެރޭގައި ވެސް ސިޔާސީ މީހުންގެ ފޮޓޯތައް ފެނިގެންދާނެ. އެހެންވީމަ އަޅުގަނޑު ހަމަ އެދެން ހުރިހާ ސިޔާސީ ފަރާތްތަކުންވެސް އަދި އެހެން ފަރާތްތަކުންވެސް އެއްގޮތަކަށްވެސް ސްޓެލްކޯގެ ފޮށިތަކުގައި އެއްްވެސް އެއްޗެއް ނުހިއްޕުމަށް.“އާޒިމް ވިދާޅުވިއެވެ.
އާޒިމް ވިދާޅުވީ ވަރަށް މުހިންމު ޚިދުމަތަކާ ގުޅުންހުރި ކަރަންޓު ބޯޑުތައް ހަޑިކޮށް ހުރުމަކީ ނުވަތަ ބޯޑެއް ބޭނުންނުކުރެވުމަކީ އެންމެންނަށްވެސް ލިބޭ ބޮޑު ގެއްލުމެއް ކަމަށެވެ.
