ދިވެހިންނަކީ ގައުމިއްޔަތާއި މެދު ފަހުރުވެރިވާ ބަޔަކަށް ވާންޖެހޭ ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޒް ހުސައިން މުހައްމަދު ލަތީފް ވިދާޅުވެއްޖެއެވެ.
ނައިބު ރައީސް މިފަދައިން ވިދާޅުވެފައި ވަނީ ”ކަޅުއޮށްފުންމި – ދިވެހި ގައުމިއްޔަތުގެ ދަރުބާރު“ ނަމުގައި މިއަދު ހުޅުވި ކޮންފަރެންސް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
އެގޮތުން އެމަނިކުފާނު ވިދާޅުވީ މި ކޮންފަރެންސަކީ ދިވެހިންގެ ގައުމިއްޔަތާއި އަމިއްލަވަންތަކަން ރައްކާތެރިކުރުމަށް އެޅޭ ހަރުދަނާ ފިޔަވަޅެއް ކަމަށެވެ.
މިއީ މިފަދަ މަގުސަދެއްގައި މި ފަހުގެ ތާރީހެއްގައި ބޭއްވޭ ފުރަތަމަ ދަރުބާރުކަން ފާހަގަކުރައްވައި ނައިބު ރައީސް ވިދާޅުވީ، އީޖާދީ ވިސްނުންތަކެއް ގެނައުމަށް މިފަދަ ދަރުބާރުތައް ވަރަށް މުހިންމު ކަމަށެވެ.
”އަޅުގަނޑު ގަބޫލުކުރާ ގޮތުގައި މިނިވަން އަދި ތަހުޒީބު ގައުމެއްގެ ގޮތުގައި އެތައް ހާސް އަހަރަކަށް ރާއްޖެ ދެމިއޮތުމަށްޓަކައި އެންމެ މުހިންމު ކަމަކީ ދިވެހި ގައުމިއްޔަތު ނެގެހެއްޓުން. އަދި ދިވެހިންގެ ގައުމިއްޔަތާއި މެދު ފަޚުރުވެރިވާ ބަޔަކަށް އަޅުގަނޑުމެން އެންމެން ވެސް ވެގެން ދިއުން،“ ނައިބު ރައީސް ވިދާޅުވި އެވެ.
ނައިބު ރައީސް އިތުރަށް ވިދާޅުވީ މިނިވަން އަދި ތަހުޒީބު ގައުމެއްގެ ގޮތުގައި ރާއްޖެ ދެމިއޮތުމަށް ގައުމިއްޔަތު ދިރުވާ އާލާ ކުރުމަކީ މުހިންމު ކަމެއް ކަމަށެވެ.
ކަޅުއޮށްފުންމި ދަރުބާރަކީ ދިވެހިންގެ އެއްބައިވަންތަކަމާއި ދެމިތިބުމާ މެދު ވިސްނައި، ފިކުރުކޮށް، ދިވެހިވަންތަކަމުގެ ބަހާތަކުގެ ފަންނީ، އިލްމީ ބައިވެރިންގެ މެދުގައި ގުޅުން ބަދަހިކޮށް އާލާކުރުމުގެ ހަފުލާއެއް ކަމަށް ރައީސް އޮފީހުން ބުނެފައިވެއެވެ.
