ވައިބާ އެކައުންޓެއް ހެކްކޮށްގެން މަކަރާއި ހީލަތުން ފައިސާ ހޯދި މައްސަލައިގެ ތަހުގީގުގައި މިހާތަނަށް ފުލުހެއްގެ އެއްވެސް ބައިވެރިވުމެއް އަދި ތުހުމަތު ކުރެވިދާނެ އެއްވެސް ކަމެއް ފާހަގަކުރެވިފައި ނުވާ ކަމަށް ފުލުހުން ބުނެފި އެވެ.
އަންގާރަ ދުވަހު އެ އިދާރާއަށް ހުށަހެޅި މައްސަލަ އާ ގުޅިގެން ރޭ ނެރުނު ނޫސް ބަޔާނެއްގައި ފުލުހުން ބުނީ މި މައްސަލައަކީ މީހެއްގެ ވައިބާ އެކައުންޓް ކޮމްޕްރޮމައިޒް ކޮށްގެން އެ މީހާ ދަންނަ މީހުންނަށް މެސެޖުކޮށް، އޮޅުވާލައިގެން ފައިސާ ހޯދާފައިވާ މައްސަލައެއް ކަމަށެވެ. މައްސަލަ އާ ގުޅުންހުރި އިތުރު 3 މައްސަލައެއް މިހާރު ތަހުގީގު ކުރަމުންދާ ކަމަށެވެ.
އެ އިދާރާއަށް މައްސަލަ ހުށަހެޅުމާ އެކު، ތަހުގީގުގެ ތެރެއިން އަޅަން ޖެހޭ ފިޔަވަޅުތައް އަޅައި ވައިބާ އެކައުންޓް ރިކަވާކޮށް އެ އެކައުންޓުގެ ވެރިފަރާތުގެ ބާރުގެ ދަށަށް އެކައުންޓް ގެނެސްފައިވާކަމަށް ވެސް ފުލުހުން ވަނީ ބުނެފައެވެ.
ފުލުހުން ބުނި ގޮތުގައި ތަފާތު 3 މީހެއްގެ އަތުން އޮޅުވާލައިގެން ހޯދި ޖުމްލަ 10،100 ރުފިޔާ، އީމެއިލް އަދި ބޭންކް އެކައުންޓް ކޮމްޕްރޮމައިޒް ވެފައިވާ އެކައުންޓަކަށް ޖަމާކޮށްފައިވާ ކަމުގަ އެވެ. އަދި މި ފައިސާގެ ތެރެއިން 5،600 ރުފިޔާ، ފައިސާ ދައުރުވެފައިވާ އެކައުންޓްތަކުގެ ތެރެއިން އެކައުންޓެއްގައި ހޯލްޑް ކުރެވިފައިވާ ކަމުގަ އެވެ.
މައްސަލައިގެ ތަހުގީގުގައި މިހާތަނަށް ފުލުހެއްގެ އެއްވެސް ބައިވެރިވުމެއް އަދި ތުހުމަތު ކުރެވިދާނެ އެއްވެސް ކަމެއް ފާހަގަކުރެވިފައި ނުވާކަމަށެެވެ.
ފުލުހުންގެ މުއައްސަސާގެ ނަން ކިލަނބުވާގޮތަށް ހަގީގަތާ ހިލާފު ހަބަރު ނުފެތުރިމަށް ފުލުހުން ވަނީ އެދިފައެވެ.
