ކޫއްޑުއާއި އައްޑޫ ފިޝަރީސް ކޮމްޕްލެސްކްއަށް މިއަދު 22 މިލިއަން ރުފިޔާ ދީފާއިވާނެ ކަމަށާއި ފެލިވަރުގެ ޕޭމަންޓްތައް ވެސް ލިބޭނެކަމަށް ސަރުކާރުގެ މަސް ކުންފުނި، މިފްކޯ އިން ބުނެފިއެވެ.
މީޑިޔާތަކަށް ފޮނުވި މެސެޖްގައި މިފްކޯ އިން ބުނީ މިއަދު އެ ކުންފުނިން އައްޑުއާއި ކޫއްޑޫ ފިޝަރީސް ކޮމްޕްލެކްސްއަށް މިދިޔަ މަހުގެ 28 ވަނަ ދުވަހުން މި މަހުގެ 15 ވަނަ ދުވަހުގެ ނިޔަލަށް ކިރާފައިވާ މަހަށްވާ ފައިސާ ދީފައިވާނެކަމަށެވެ. އެއީ ޖުމްލަ 22،922،141 ރުފިޔާއެވެ.
މަސްވެރިންނަށް މިއަދު ފައިސާ ދޫކުރި އަދަދަކީ 28 މިލިއަން ރުފިޔާއިން 5،786،266 ޑީސަލަށް ކަނޑާފައިވާ މިންވަރުކަމަށް ވެސް މިފްކޯއިން ވަނީ ބުނެފައެވެ.
ފައިސާ ދޫކުރިއިރު މިދިޔަ މަހުގެ 28 ވަނަ ދުވަހުން މި މަހުގެ 15 ވަނަ ދުވަހުގެ ނިޔަލަށް ފެލިވަރު ފިޝަރީސް ކޮމްޕްލެކްސްއަށް ކިރާފައިވާ މަހަށް ފައިސާ ނުދެވޭ ކަމަށާއި ދެން އެންމެ އަވަހަށް ދޫކުރާނީ އެ ފައިސާ ކަމަށް ވެސް އެ ކުންފުނިން ވަނީ ބުނެފައެވެ.
މަސްވެރިންނަށް ފައިސާ ދިނުމުގައި ލަސްތަކެއް އުޅުނު ނަމަވެސް އަބަދުވެސް މަސައްކަތް ކުރަނީ ވީއެންމެ އަވަހަށް މަސްވެރިންނަށް ފައިސާދީ ހަލާސްކުރެވޭތޯކަމަށް ވެސް މިފްކޯ އިން ވަނީ ހާމަކޮށްފައެވެ.
