އިޒްރޭލު ޕާސްޕޯޓުގައި ރާއްޖެ އެތެރެވަނީ މަދު ބައެއް ކަމަށް ބުނެ ޕާސްޕޯޓް މަނާ ކުރަން ބޭނުން ނުވާ ކަމަށް ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް) އިން ބުނެފި އެވެ.
އިޒްރޭލު ޕާސްޕޯޓް މަނާކުރަން އިމިގްރޭޝަން ގާނޫނަށް ހުށަހަޅާފައިވާ އިސްލާހު ގެނައުމުގެ ބިލާ ގުޅޭގޮތުން ހިޔާލު ހޯދުމަށް 241 ކޮމިޓީގެ މިއަދުގެ ބައްދަލުވުމަށް ގެސްޓްހައުސް އެސޯސިއޭޝަންގެ ބޭފުޅުން ވަނީ ހާޒިރުކޮށްފަ އެވެ.
އެ ކޮމިޓީގައި އެސޯސިއޭޝަނުގެ މެންބަރަކު ވިދާޅުވީ އިޒްރޭލު ޕާސްޕޯޓް މަނާކުރުމުން އޭގެ ސަބަބުން ނޭދެވޭ ނަތީޖާ ނިކުމެދާނެ ކަމަށެވެ. އޮންލައިން ޕްލެޓްފޯމްތަކުގެ މޭޖަ ޝެއާހޯލްޑިން އޮންނަނީ ޔަހޫދީ ދައުލަަތަށް ނިސްބަތްވާ ބައެއްގެ އަތުގައި ކަމަށެވެ.
އެންއެޗްޖީއޭއެމްގެ އެންމެ ބޮޑު ކަންބޮޑުވުމަކީ އިޒްރޭލުގެ ޕާސްޕޯޓު މަނާކުރުމުން ފަތުރުވެރިކަމުގެ ސިނާއަތަށް ކުރާނެ ނޭދެވޭ އަސަރުތަކެވެ.
”އިޒްރޭލަކީ ޑުއަލް ޕާސްޕޯޓު ގެންގުޅޭ ގައުމެއް ވީމާ އަޅުގަނޑުމެންގެ ސްޓޭންޑަކީ އެއްވެސް ވަރަކަށް ތާއީދެއް ނުކުރަން. އިޒްރޭލުގެ ވެރިންގެ ޕާސްޕޯޓު ބޭން ކުރަން އަޅުގަނޑުމެން ވަރަށް ބޮޑަށްތާއީދުކުރަން،“ އެ އެސޯސިއޭޝަންގެ މެމްބަރަކު ވިދާޅުވިއެވެ.
އިޒްރޭލުން އަންނަ މީހުންގެ އަދަަދަށް އަލިއަޅުވާލާ އެ އެސޯސިއޭޝަނުން ބުނީ މިދިޔަ އަހަރު އެ ގައުމުން 10،380 މީހުން އައިސްފައިވާ ކަމަށެވެ. އެހެންނަމަވެސް މި އަހަރުގެ މިހާތަނަށް އައީ ގާތްގަނޑަކަށް 1،200 މީހުން ކަމަށެވެ.
އެ ޖަމިއްޔާ އިން އެހެން ބުނި ނަމަވެސް ސަރުކާރުން އަންނަނީ އިޒްރޭލް ޕާސްޕޯޓް މަނާ ކުރަން މަސައްކަތްތަކެއް ކުރަމުންނެވެ.
