ވޯލްޑް ލީޑިންގ ޑެސްޓިނޭޝަންގެ އެވޯޑް މިފަހަރުވެސް ރާއްޖެއަށް!

ވޯލްޑް ޓްރެވަލް އެވޯޑްސްގެ ”ވޯލްޑް ލީޑިން ޑެސްޓިނޭޝަން އެވޯޑް“ ޖެހިޖެހިގެން 5 ވަނަ ފަހަރަށް ރާއްޖެއިން ހޯދައިފިއެވެ.

ޕޯޗުގަލްގެ މަދީރާގައި އޮތް މި އަހަރުގެ ވޯލްޑް ޓްރެވަލް އެވޯޑްސްގެ ރަސްމިއްޔާތުގައި ރާއްޖޭގެ ފަރާތުން އެވޯޑާ ހަވާލުވެވަޑައިގެންނެވީ ޓޫރިޒަމް މިނިސްޓަރު އިބްރާހިމް ފައިސަލް އެވެ. މި އެވޯޑު ރާއްޖެއިން ހާސިލުކޮށްފައި ވަނީ 18 ގައުމަކާ ވާދަކޮށްގެންކަން ފާހަގަކޮށްލެވެއެވެ.

އެވޯޑް ހާސިލްވުމާއެކު ”އެކްސް“ ގައި ކުރެއްވި ޕޯސްޓެއްގައި މިނިސްޓަރ ފައިސަލް ވިދާޅުވީ އެވޯޑު ރާއްޖެއަށް ލިބިފައި ވަނީ އެތައް ބައެއްގެ ބުރަ މަސައްކަތުން ކަމަށެވެ. އަދި އެވޯޑާ ހަވާލުވެވަޑައިގަތުމުގެ ފުރުސަތު ލިބިވަޑައިގަތުމަކީ ފަހުރެއް ކަމުގައި ފާހަގަކުރެއްވި އެވެ.

ވޯލްޑް ލީޑިން ޑެސްޓިނޭޝަން އެވޯޑުގެ އިތުރުން ރާއްޖެއިން ވަނީ ވޯލްޑް ލީޑިން ގްރީން ޑެސްޓިނޭޝަންގެ އެވޯޑާއި ވޯލްޑް ލީޑިން ސީޕްލޭން އޮޕަރޭޓާ އެވޯޑު ހޯދާފަ އެވެ. މި އެވޯޑު ލިބިފައި ވަނީ ޓްރާންސް މޯލްޑިވިއަން އެއާވޭސް (ޓީއެމްއޭ) އަށެވެ. މި އެވޯޑުތަކުގެ އިތުރުން ރާއްޖޭގެ ރިސޯޓުތަކުން ވަނީ ގިނަ އެވޯޑުތަކެއް ހޯދާފަ އެވެ.