ޕީއެންސީން އަމާޒު ހިފާފައި ހުރީ އެއް ލައްކަ މެމްބަރުން ހަމަ ކުރަން!

ޕީޕަލްސް ނެޝަނަލް ކޮންގްރެސް (ޕީއެންސީ) އިން އަމާޒު ހިފާފައި ހުރީ އެ ޕާޓީއަށް އެއް ލައްކަ މެމްބަރުން ހަމަކުރަން ކަމަށް ޕާޓީގެ ޗެއާރޕާސަން އަބްދުއްރަހީމް އަބްދުﷲ ވިދާޅުވެއްޖެއެވެ.

އަބްދުއްރަހީމް މިފަދައިން ވިދާޅުވެފައި ވަނީ ޕީއެންސީގެ އެތެރޭގެ އިންތިޚާބް ކުރިޔަށްދާތާ ހުންނަވާ މީޑިޔާތަކަށް ދެއްވި ހާއްސަ އިންޓަވިޔުއެއްގައެވެ. އެގޮތުން އަބްދުއްރަހީމް ވިދާޅުވީ މިހާރު ޕީއެންސީގައި 97،000 ސައްހަ ފޯމު އެބަހުރިކަމަށެވެ. އެހެންނަމަވެސް އެ ޕާޓީގެ އަމާޒަކީ ލައްކަ އެއް ހަމަކުރުންކަމަށް ވެސް އަބްދުއްރަހީމް ވިދާޅުވިއެވެ.

ޕާޓީއަށް 97،000 ފޯމް ލިބިފައިވާއިރު، ދަފްތަރުކުރެވިފައި 75،000 ފޯމު އެބަހުރި ކަމަށް އަބްދުއްރަހީމް ވިދާޅުވިއެވެ. އެހެންނަމަވެސް އިލެކްޝަންސް ކޮމިޝަންގެ އޮންނަ ގަވާއިދެއްގެ ސަބަބުން ޕާޓީގެ ދަފްތަރަށް އިތުރުވަމުން ދަނީ ހަފްތާއަކު އެއްފަހަރު ކަމަށް އަބްދުއްރަހީމްގެ ވާހަކައިގައި ފާހަގަކުރެއްވިއެވެ. އޭނާ ވިދާޅުވި ގޮތުގައި ޕާޓީގެ ދަފްތަރަށް އީސީން އެންޓަރ ކުރަނީ ފޯމު ހުށަހެޅުމުން ޝަކުވާއަށް ހުޅުވާލުމަށްފަހު ހަފްތާއެއް ފަހުންނެވެ.

ޕީއެންސީ އިން އަންނަނީ އެ ޕާޓީއަށް މެމްބަރުން އިތުރު ކުރުމަށްޓަކައި ”ޕީއެންސީ މެމްބަރޝިޕް ޑްރައިވް“ ގެ ނަމުގައި ޕާޓީއަށް ފޯމް ފުރުމުގެ ހަރަކާތްތަކެއް ވެސް ކުރިޔަށް ގެންދަމުންނެވެ.