ގުޅިން ފާނަބަސަންދުގެ ގިނަ ކޭސްތަކެއް ފެނިއްޖެ!

ކ. ގުޅިން ފާނަބަސަންދުގެ 11 ކޭސް ރިޕޯޓްކޮށްފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން މިއަދު ބުނެފި އެވެ.

އެޗްޕީއޭއިން ހާމަކުރެއްވި ގޮތުގައި މިއަހަރުގެ ނޮވެމްބަރު މަހާ ހަމައަށް މުޅި ރާއްޖެއިން 2977 މީހުން ވަނީ ފާނަބަސަންދު ޖެހިގެން ރިޕޯޓްކޮށްފަ އެވެ. މީގެ ތެރެއިން 1506 ކޭސް ރިޕޯޓްކޮށްފައިވަނީ މާލެ ސަރަހައްދުންނެވެ. އަދި 1471 ކޭސް ރިޕޯޓްކޮށްފައިވަނީ އަތޮޅުތަކުންނެވެ.

އެގޮތުން މި މަހުގެ ތެރޭގައި ކ. ގުޅިން ފާނަބަސަންދުގެ 11 ކޭސް ރިޕޯޓް ކޮށްފައިވާ ކަމަށްވެސް އެޗްޕީއޭއިން ބުނެފައިވެއެވެ.

މީގެ ތެރެއިން ދެ މީހަކަށް އައިޖީއެމްއެޗްގައި އިތުރު ފަރުވާ ދެމުންދާ ކަމަށްވެސް އެ އިދާރާއިން ވަނީ މައުލޫމާތު ދީފައެވެ.

ފާނަބަސަންދުއަކީ ވައިރަހަކުން ޖެހޭ ބައްޔެކެވެ. މި ބަލި އާންމުކޮށް ކުޑަކުދިންނަށް ޖެހުނު ނަމަވެސް ބޮޑެތި މީހުންނަށް ވެސް މި ބަލި ޖެހެއެވެ. މި ބަލީގެ އަލާމަތްތަކުގެ ތެރޭގައި ހުން އައުން، ވަރުދެރަވުން، ނޭފަތުން ފެން އައުން އަދި ގައިގައި ހިމަ ބިހިތަކެއް ނެގުން ހިމެނެ އެވެ.