އިސްލާމީ މަރުކަޒުގެ މަސްފެންގަނޑު ސްޓެލްކޯއިން ނިންމާ މިނިސްޓްރީއާ ހަވާލުކޮށްފި

އިސްލާމީ މަރުކަޒުގެ މުންނާރުގެ ތިރީގައި ހަދާފައިވާ މަސް ފެންގަނޑު ސްޓެލްކޯއިން މަރާމާތު ކުރުމަށްފަހު އިސްލާމިކް މިނިސްޓްރީއާ މިއަދު ހަވާލުކޮށްފި އެވެ.

މިއަދު ހެނދުނު އިސްލާމީ މަރުކަޒު ގޯތިތެރޭގައި ބޭއްވި ހަފުލާގައި މަސައްކަތް ނިމުނުކަމުގެ ލިޔުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާ ހަވާލުކޮށްދެއްވީ ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ އެވެ.

މި ރަސްމިއްޔާތުގައި މިނިސްޓަރ ޝަހީމް ވިދާޅުވީ، އެމްޑީ ފަހުމީގެ އިސްނެންގުވުމަށް ސްޓެލްކޯގެ އިޖުތިމާއީ ޒިންމާގެ ދަށުން ކުރިއަށްވުރެ މާރީތިކޮށް ސްޓެލްކޯއިން އެ ފެންގަނޑު ހަދާފައިވާ ކަމަށެވެ.  އެ ސަރަހައްދަކީ ގިނަ އަދަދެއްގެ ކުޑަ ކުދިންނާއި މީހުން ޖަމާވާ ސަރަހައްދެއް ކަމުން އެތަނުގެ ރީތިކަން ދެކި، އެ ހިތްހަމަޖެހުން އެ ފަރާތްތަކުން ލިބިގަންނާނެ ކަމަށް މިނިސްޓަރ ފާހަގަކުރެއްވެވިއެވެ.

މިނިސްޓަރ އިތުރަށް ވިދާޅުވީ  އެ މަސްފެންގަނޑު ހަލާކުވެފައިވާތާ ވަރަށް ގިނަ ދުވަސްވެފައިވާ ކަމަށެވެ. އެހެންކަމުން ކުރު މުއްދަތެއްގެ ތެރޭގައި ސްޓެލްކޯއިން އެތަން މަރާމާތުކޮށް، އިސްލާމީ މަރުކަޒަށް 40 އަހަރުވުމާ ގުޅިގެން ބާއްވަން ނިންމަވާފައިވާ ޖަލްސާގެ ކުރިން އެތަން ހުޅުވައިދެއްވި ކަމަށްޓަކައިި މިނިސްޓާރ ވަނީ ވަރަށް ބޮޑަށް ޝުކުރު އަދާކުރައްވާފައެވެ.

މުންނާރު ކައިރީ އޮންނަ މަސްފެންގަނޑު މީގެ ކުރިން އޮންނަނީ ވަރަށް ހަޑި ކޮށެވެ. ނަމަވެސް މިހާރު ވަނީ އެތަން އެއްކޮށް ސާފުކޮށް ކުލަ ބަދަލުކޮށް މަސް ވެސް ލައިފަ އެވެ.