ދުންފަތުގެ ވިޔަފާރި ދެން ކުރެވޭނީ ލައިސެންސް ހޯދައިގެން: ހެލްތް މިނިސްޓްރީ

ގަވައިދު އާންމު ކުރުމުން ދުންފަތުގެ ބާވަތްތަކުން ވިޔަފާރި ކުރެވޭނީ އެކަން ކުރުމުގެ ލައިސެންސް ހޯދައިގެން ކަމަށް ހެލްތު މިނިސްޓްރީން ބުނެފި އެވެ.

ދުންފަތް ކޮންޓްރޯލްކުރުމާ ބެހޭ ގާނޫނަށް ގެނައި 1 ވަނަ އިސްލާހަށް މިދިޔަ ހުކުރު ދުވަހުން ފެށިގެން އަމަލުކުރަން ފަށާފައިވާއިރު
އޭގައިވާ ގޮތުން، ދުންފަތުގެ ބާވަތްތައް އެތެރެކުރުމާއި ބޭރުކުރުން އަދި ދުންފަތުގެ ބާވަތްތައް ގަނޑުކޮށް ނުވަތަ ވަކިވަކިން ރާއްޖޭގައި ވިއްކާ ކޮންމެ ފަރާތެއް، ވިޔަފާރިކުރުމުގެ ހުއްދައިގެ އިތުރުން ހެލްތު މިނިސްޓްރީން ދޫކުރާ ސައްހަ ލައިސެންސެއް އޮންނަން ޖެހެއެވެ. އަދި އެ ލައިސެންސް ދޫކުރުމަށް، ގާނޫނަށް އަމަލުލުރަން ފަށާތާ 60 ދުވަސް ދުވަހުގެ ތެރޭގައި ވަކި ގަވައިދެއް ހަދަންޖެހެ އެވެ.

މިކަމާ ގުޅިގެން ހެލްތު މިނިސްޓްރީން ކުރި އިއުލާނުގައި ބުނީ ދުންފަތް ވިއްކުމުގެ ހާއްސަ ހުއްދަ ހޯދުން ލާޒިމް ވާނީ އެ ހުއްދަތައް ދިނުމުގެ އުސޫލާއި އިޖުރާއަތްތައް ކަނޑައަޅާ ބަޔާންކުރާ ގަވައިދު އާންމުކޮށް، އެ ކަނޑައަޅާ މުއްދަތުގައި ކަމަށެވެ. އެ މުއްދަތުގެ ފަހުން، ހުއްދަ ނެތި ދުންފަތުގެ އެއްވެސް ވިޔަފާރިއެއް ކުރުމަކީ މަނާކަމެކެވެ.

އޭގެއިތުރުން ގަވައިދާ ހިލާފަށް ދުންފަތުގެ ބާވަތްތަކުން ވިޔަފާރިކޮށްފި ނަމަ އޭގެ ލައިސެންސް ބާތިލްކުރުން ވެސް ހިމެނެއެވެ.

ގާނޫނުގައިވާ ގޮތުން ހުއްދަ ނުނަގާ، އުސޫލާ ހިލާފަށް ދުންފަތުގެ ބާވަތްތަކުގެ ވިޔަފާރި ކުރާނަމަ 1،000-1،000،000ރ. އާ ދެމެދުގެ އަދަދަކުން ޖޫރިމަނާކުރާނެ އެވެ.