ރައްޔިތުންގެ މަޖިލީހުގެ މެންބަރަކު ތަމްސީލު ކުރައްވާ ސިޔާސީ ޕާޓީ ބަދަލުކޮށްފިނަމަ, ނުވަތަ އެ ޕާޓީއަކުން ވަކިކޮށްފި ނަމަ، މެންބަރަކުކަން ގެއްލޭ ގޮތަށް ގާނޫނުއަސާސީ އަށް ހުށަހެޅި އިސްލާހު މަޖިލީހުން މިއަދު ފާސްކޮށްފިއެވެ.
ހުޅުދޫ ދާއިރާގެ ޕީއެންސީގެ މެންބަރު މުހައްމަދު ޝާހިދު ސަރުކާރުގެ ފަރާތުން ގާނޫނުއަސާސީއަށް ހުށަހެޅުއްވި އެ އިސްލާހުގެ ފުރަތަމަ ކިޔުން މަޖިލީހުގައި މިއަދު އިއްވުމާއެކު އެ ބިލުގެ ބަހުސް މަރުހަލާ ނިންމައި، މުޅި މަޖިލީހުގެ ކޮމިޓީއަށް ފޮނުވިއެވެ.
އެއަށްފަހު ކޮމިޓީ ރިޕޯޓު ފާސް ކުރުމާ މެދު ގޮތެއް ނިންމަން މިއަދު ހަވީރު ބޭއްވި މަޖިލީހުގެ ޖަލްސާގައި 78 މެންބަރުން ފެންނަ ކަމަށް ވޯޓު ދެއްވިއެވެ. ފާސްކުރަން ނުފެންނަ ކަމަށް ވޯޓު ދެއްވީ އެންމެ 13 މެންބަރުންނެވެ.
މި އިސްލާހުގައި ވާގޮތުން ސިޔާސީ ޕާޓީއެއްގެ ފަރާތުން މަޖިލިސް އިންތިހާބުގައި ވާދަކޮށްގެން އިންތިހާބުވުމަށް ފަހު، އެ ދައުރުގެ ތެރޭގައި އެ ޕާޓީއަކުން ވަކިވެއްޖެ ނަމަ، ނުވަތަ ޕާޓީން ވަކިކޮށްފި ހާލަތެއްގައި، ނުވަތަ އެހެން ޕާޓީއެއްގެ މެންބަރަކަށް ވެއްޖެ ހިނދު، އެމީހަކު މަޖިލީހުގެ މެންބަރުކަމުން ވަކިވާނެ އެވެ. އަދި މެންބަރަކު މިހާރު ތަމްސީލް ކުރައްވާ ސިޔާސީ ޕާޓީއަކުން އަމިއްލައަށް ވަކިވެއްޖެ ހާލަތެއްގައި، ނުވަތަ ވަކިކޮށްފި ކަމަށް ވާނަމަ، ނުވަތަ އެހެން ޕާޓީއަކާ ގުޅިއްޖެ ހާލަތެއްގައިވެސް ގޮނޑި ގެއްލޭނެ ކަމަށް އެ އިސްލާހުގައިވެއެވެ.
މީގެ އިތުރުން އަމިއްލަގޮތުން ވާދަކޮށްގެން ދާއިރާއަކަށް އިންތިހާބުވާ މެންބަރަކު ސިޔާސީ ޕާޓީއަކާ ގުޅިވަޑައިގެންފި ނަމަވެސް އެ މެންބަރެއްގެ ގޮނޑި ގެއްލޭނެ އެވެ.
މި ބިލުގެ މަސައްކަތް މިއަދު ކުރިއަށް ދަނިކޮށް، އިދިކޮޅު އެމްޑީޕީގެ ސަޕޯޓަރުން ވަނީ މަޖިލިސް ދޮށުގައި އިހުތިޖާޖު ކޮށްފައެވެ. އެވަގުތު ޕީއެންސީގެ ސަޕޯޓަރުން ވެސް ވަނީ މަޖިލިސް ކައިރިއަށް އެއްވެ އެބިލާ އެއްކޮޅަށް އަޑުއުފުލާފައެވެ.
