2025 ވަނަ އަހަރަށް ހުށަހެޅޭ ބަޖެޓަކީ މާލީ ގާނޫނު ދަންނަގޮތަށް ގާނޫނުތަކާއި ގަވައިދުތަކާއި އެއްގޮތަށް ހުށަހެޅޭ ފުރަތަމަ ބަޖެޓުކަމުގައި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު އަލީ އިބްރާހިމް (ކަައްޕި) ވިދާޅުވެއްޖެއެވެ.
އަންނަ އަހަރުގެ ބަޖެޓު ބަހުސްގައި ބައިވެރިވެވަޑައިގެން އިއްޔެ މަޖިލީހުގެ ޖަލްސާގައި ވާހަކަ ދައްކަވަމުން ކަައްޕި ވިދާޅުވީ، މިއީ އުންމީދުން ފުރިގެންވާ ބޯހިޔާވަހިކަމަށް ހާއްސަ ބަޖެޓެއް ކަމުގައެވެ.
”މާލޭގެ ރައްޔިތުންނަށް އެތައް އަހަރެއް ވަންދެން އެތައް ޒަމާނެއް ވަންދެން ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދުމަށް މި ބަޖެޓުގައި ބޮޑު އަދަދެއް ހިމަނާފައިވާނެ.“ ކަައްޕި ވިދާޅުވިއެވެ.
މާޒީވި ކޮންމެ ވެރިކަމެއްގައި ވެސް ފެނިފައިވަނީ ދައުރުގެ ފަހުކޮޅުގައި ބޯހިޔާވަހިކަމަށް ހަައްލު ހޯދުމަށް މަސައްކަތް ކުރާތަންކަން ކަައްޕި ފާހަގަކުރެއްވިއެވެ. އެއާ ހިލާފަށް ރައީސް ޑރ.މުހައްމަދު މުއިއްޒުގެ މި ހިނގާ ވެރިކަމުގެ ކުރީކޮޅު އެކަމަށް ހާއްސަ އަހައްމިއްޔަތުކަމެއް އެމަނިކުފާނު ދެއްވާފައިވާކަމަށް މިކަމާ ގުޅޭ އިތުރު މައުލޫމާތު ”ބޮންތި“ އާއި ހިއްސާކުރައްވަމުން ކަައްޕި ވިދާޅުވިއެވެ.
”އެގޮތުން 15000 ހައުސިންގ ޔުނިޓް އަންނަ އަހަރު ފެށުމަށް ހަމަޖެހިފައިވޭ. މީގެ އިތުރުން ވެސް ބޯހިޔާވަހިކަމަށް ގެދޮރު ބިނާކުރުމަށް، މާލެ ސަރަހައްދަށް ލޯނު ދޫކުރުމަށް ބަޖެޓުގައި ވާނީ ހިމަނާފައި.“ ކަައްޕި ވިދާޅުވިއެވެ.
މާލެ، ވިލިމާލެ ބުރިޖާއި އަދިވެސް ބޮޑެތި މަޝްރޫއުތަކަށް، ބަޖެޓު ކުރެވިފައިވާކަމަށް ކަައްޕި ވިދާޅުވިއެވެ.
ދައުލަތުގެ ހޭދަތައް ކުރުމަށް އަންނަ އަހަރަށް ލަފާކޮށް ސަރުކާރުން ހުށަހަޅާފައިވާ 56.6 ބިލިއަން ރުފިޔާގެ ބަޖެޓުގެ ބޮޑުބައެއް ބޯހިޔާވަހިކަމަށް ހާއްސަކޮށްފައިވާކަން ފާހަގަކޮށްލެވެއެވެ.
