ފުރާނައިގެ އަގު ބޮޑު ކަމަށާއި ރައްކާތެރިކަމާއެކީ ދުއްވުމަށް ރައީސް ޑރ.މުހައްމަދު މުއިއްޒު އިލްތިމާސްކުރައްވައިފިއެވެ.
ގިނަ އެކްސިޑެންޓްތަކެއްގައި ހިތާމަވެރި ހާދިސާތައް މި ފަހުން ހިނގަމުން އަންނަ ދަނޑިވަޅެއްގައި ސެލްމިން އެނިމޭޝަން ސްޓޫޑިއޯއިން އުފައްދާފައިވާ ވީޑިއޯ މެސެޖެއް އެކްސްގައި މިއަދު ހިއްސާކުރައްވައި ރައީސް ވިދާޅުވީ އެންމެން ގުޅިގެން މަގުތަށް އަމާން ތަނަކަށް ހެދޭނެ ކަމުގައެވެ.
”އަޅުގަނޑުމެންގެ އަމިއްލަ އަތުން ހެދޭ ގޯސް ރަނގަޅުކުރާކަށް ދެވަނަ ފުރުސަތެއް ނުލިބޭނެ. ފުރާނައަކީ އަގުބޮޑު އެއްޗެއް.“ ރައީސް ވިދާޅުވިއެވެ.
މި ޕޯސްޓުގައި ރައީސް ވަނީ ސެލްމިން އެނިމޭޝަންގެ ބާނީ ޔާމީން ރަޝީދުއަށް ޝުކުރު ދަންނަވާފައެވެ.
މި ވީޑިއޯގައި ޔާމީން ރަޝީދު ދައްކަނީ ބައްޕައަކު އޭނާގެ ދަރިފުޅަށް ހަދިޔާއަކަށް ގަޑިއެއް ދިނުމަށް ދަރިފުޅުގެ ގެއަށް ދިއުމަށް ސައިކަލެއްގައި ދަނިކޮށް ވަންވޭއާއި އިދިކޮޅަށް ބާރު ސްޕީޑުގައި އައި ކާރެއް އޭނާގެ ސައިކަލުގައި ޖެހި އެކްސިޑެންޓްވާ ތަނެވެ. އަދި ކާރު ޑްރައިވަރު ކާރުން ފޭބުމަށްފަހު އެކްސިޑެންޓްވެފައި އޮތް މީހާ ނަގާއިރު އެއީ އޭނާގެ ބައްޕަކަން އެނގުމުން އެކަމާ ހިތާމަކުރާ މަންޒަރެވެ.
