ފަންނުވެެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް 3 ލައްކައާ ހަމައަށް މާލީ އެހީދޭނެ ކްރިއޭޓިވް އިކޮނޮމީ ފަންޑެއް އިކޮނޮމިކް މިނިސްޓްރީން އިފްތިތާހުކޮށްފިއެވެ.
މި ފަންޑު އިފްތިތާހުކޮށްދެއްވީ ރޭ ދަރުބާރުގޭގައި ބޭއްވި ހާއްސަ ރަސްމިއްޔާތެއްގައި މިނިސްޓަރ އޮފް އިކޮނޮމިކް ޑިވެލޮޕްމަންޓް މުހައްމަދު ސައީދެވެ.
އަންނަ އޮކްޓޯބަރު މަހުގެ 10 ވަނަ ދުވަހުން ފެށިގެން ކުރިމަތިލެވޭގޮތަށް ހަމަޖެހިފައިވާ މި ލޯނު ދޫކުރުމަށް ހަމަޖެހިފައިވަނީ ހަތަރު ދާއިރާއަކަށް އަމާޒުކޮށްގެނެވެ. މި މަސައްކަތުގައި އިސްކޮށް ހަރަކާތްތެރިވާނީ އިކޮނޮމިކް މިނިސްޓްރީގެ ބެލެނިވެރިކަމުގެ ދަށުން ހިންގަމުން އަންނަ ބިޒްނަސް ސެންޓަރ ކޯޕަރޭޝަން (ބީސީސީ) އިންނެވެ. އަދި މިލޯނުތައް ފަރުމާކޮށްފައިވަނީ 50،000 (ފަންސާސް ހާސް) ރުފިޔާއިން ފެށިގެން 300،000 (ތިން ލައްކަ) ރުފިޔާ އާއި ހަމައަށެވެ.
މި ފަންޑުގެ ތެރެއިން މި އަހަރު ލޯނު ދޫކުރާނީ، މިއުޒިކް އުފެއްދުމަށާއި، ފިލްމް އުފެއްދުމަށާއި، އާޓްސް އެންޑް ކްރާފްޓް ދާއިރާއާއި ޑިޖިޓަލް ކޮންޓެންޓް ކްރިއޭޝަންގެ ދާއިރާއިންނެވެ. އެހެން ނަމަވެސް މި ފަންޑު އިތުރަށް ފުޅާކޮށް އިތުރު ދާއިރާތަކަށް ލޯނު ދޫކުރަން އަންނަ އަހަރު ހަމަޖެހިފައިވާކަމަށް ބީސީސީން ވަނީ ބުނެފައެވެ. އަދި މިފަންޑުގެ ތެރެއިން ލޯނު ދޫކުރެވޭ ފަރާތްތަކަށް ލޯނު ދެއްކުމުގައި ފަސޭހަ ގޮތްތަކެއް ހަމަޖެހިފައިވާކަމަށްވެސް ބީސީސީން ބުންޏެވެ.
