ޗައިނާގެ ވެރިކަންކުރާ ޕާޓީ ކަމުގައިވާ ކޮމިއުނިސްޓް ޕާޓީގެ ދައުވަތަކަށް ޕީއެންސީގެ ވަފުދެއް އެގައުމަށް ރޭ ފުރައިވަޑައިގެންފިއެވެ.
ޗައިނާއަށް ފުރި ވަފުދުގައި ހިމެނިވަޑައިގަންނަވަނީ ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސެއިން، މުލަކު ދާއިރާގެ މެންބަރު އިބްރާހިމް ނައުފަލް، ކިނބިދޫ ދާއިރާގެ މެންބަރު އަލީ އަޝްރަޤު، ކުޅުދުއްފުށީ އުތުރު ދާއިރާގެ މެންބަރު މުހައްމަދު ދާއޫދު، ހިތަދޫ މެދު ދާއިރާގެ މެންބަރު އަހްމަދު އަޒާން، އިސްދޫ ދާއިރާގެ މެންބަރު އިސްމާއިލް ޝަފީއު، މަނަދޫ ދާއިރާގެ މެންބަރު ހުސްނީ މުބާރިކު އަދި ގެމަނަފުށީ ދާއިރާގެ މެންބަރު އަސަދުﷲ ޝިހާބެވެ. މީގެ އިތުރުން ޓްރާންސްޕޯޓް މިނިސްޓަރ މުހައްމަދު އަމީންވެސް ވަނީ މި ދަތުރުފުޅުގައި ބައިވެރިވެވަޑައިގެންފައެވެ.
މި ދަތުރުފުޅުގައި ޗައިނާގެ ތިން ސިޓީއަކަށް ޒިޔާރަތް ކުރުމަށް ހަމަޖެހިފައިވާއިރު، އެއީ ވެރިރަށް ބެއިޖިންގެ އިތުރުން ޗަންޑޫ އާއި ފޫޖިއާނެވެ. ސެޗްއާން ޕްރޮވިންސްގެ އިސްވެރިންނާއި ޕީއެންސީގެ ވަފުދުން ބައްދަލުކުރަން ހަމަޖެހިފައިވާއިރު އެތަނަކީ މިހާރު ވެސް ރާއްޖެއަށް އެންމެ ގިނައިން ފަތުރުވެރިން އަންނަ އެއް ޕްރޮވިންސެވެ. އަދި މޯލްޑިވިއަނުންވެސް އެތަނަށް ދަތުރުތައް ފެށުމަށް ވަނީ ހަމަޖެހިފައެވެ.
މި ދަތުރުގެ މުއްދަތަކީ10 ދުވަހެވެ.
