ދިވެހިރާއްޖޭގެ ދިދަ އާއި ދައުލަތުގެ ނިޝާން ހިމާޔަތްކުރާނެ ގާނޫނެއް އެކުލަވާލުމުގެ މަސައްކަތް ކުރައްވަމުން އަންނަ ކަމަށް ދިވެހި ބަހާއި ތަރިކައާ ގުޅޭ ވަޒީރު އާދަމް ނަސީރު އިބްރާހިމް ވިދާޅުވެއްޖެއެވެ.
ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ނަސީރު ވިދާޅުވީ، އެފަދަ ގާނޫނެއް މިވަގުތު ނެތް ކަމުގައެވެ.
ވަޒީރު ވިދާޅުވީ ދިވެހި ދައުލަތުގެ ގައުމީ ރަމްޒުތައް ހިމާޔަތްކުރުމަށް ބިލެއް ޑްރާފްޓްކުރުމުގެ މަސައްކަތް ކުރެވެމުން ދާ ކަމަށާއި، ރައީސް ޑރ. މުހައްމަދު މުއިއްޒު ގެންގުޅުއްވާ ސިޔާސަތުގެ ތެރެއިން ދިވެހި ދިދައަށް ލިބެންޖެހޭ ގަދަރާއި ހިމާޔަތާއި ރައްކާތެރިކަން ކަށަވަރު ކުރައްވާނެ ކަމުގައެވެ.
ދިވެހިންގެ ހިތްތަކުގައި ގައުމިއްޔަތަށް އޮންނަ ލޯބި އިތުރުކުރުމުގެ މަގްސަދުގައި ސަރުކާރުން ގިނަ މަސައްކަތްތަކެއް ކުރަމުންދާއިރު، ދާދިފަހުން ސަރުކާރުން ވަނީ ”ދިވެހި ގައުމިއްޔަތުގެ އިސްވަރު“ ގެ ނަމުގައި މިމަހުގެ ކުރީކޮޅު ހާއްސަ ކޮލެޖެއް ހުޅުވާފައެވެ.
