އުސޫލުތަކާ ހިލާފަށް، ބޭނުން ނުކުރާ ކަރަންޓަށް ބިލު ނުކުރާނެ ކަމުގެ ޔަގީންކަން ސްޓެލްކޯއިން ދީފިއެވެ.
ހިދުމަތްތަކަށް ފާޑުކިއުން އަމާޒުވެފައިވާ މި ދަނޑިވަޅެއްގައި ނެރުނު ބަޔާނެއްގައި ސްޓެލްކޯއިން ބުނީ، އެ ކުންފުނީގެ އެންމެ ބޮޑު ހިތްހަމަޖެހުމަކީ މުވައްޒަފުން ކުރަމުންދާ އިހުލާސްތެރި މަސައްކަތް ކަމުގައެވެ. އެގޮތުން 24 ގަޑިއިރު މެދު ނުކެނޑި ކަރަންޓު ފޯރުކޮށްދިނުމަށްޓަކައި ސްޓެލްކޯގެ މުވައްޒަފުން ކުރަމުންދަނީ އިހުލާސްތެރި މަސައްކަތެއް ކަމަށް އެ ކުންފުނިން ބުނެފައިވެ އެވެ.
ކޮންމެ މަހަކު ކަސްޓަމަރުންގެ ގެތަކަށް ގޮސްގެން މީޓަރުތަކުގެ ރީޑިން ނަގައި ބިލްތައް ތައްޔާރުކޮށް، އެ ބިލްތައް ފޮނުވުމާއި، ބިލަށް ފައިސާ ބަލައިގަނެ، ކަސްޓަމަރުން ބޭނުންވާ ހިދުމަތްތައް ފޯރުވައިދޭން ކެނޑިނޭޅި ކުރަމުންދާ މަސައްކަތްތަކަކީ، ގަވާއިދުތަކާއި އުސޫލުތަކުގެ ތެރެއިން އެ މުވައްޒަފުން ކުރަމުންގެންދަނީ ވަރަށް ބުރަ އަދި ބޮޑު މަސައްކަތްތަކެއް ކަން ސްޓެލްކޯއިން ފާހަގަކުރެއެވެ.
”ރައްޔިތުންގެ މެދުގައި އޮތް ކުންފުނީގެ ތަޞައްވުރު ނައްސި ވާގޮތަށް މިފަދަ ޒިންމާދާރުކަން ކުޑަ ވާހަކަތައް ފެތުރުން މި ކުންފުނިން ވަރަށް ހަރުކަށި އިބާރާތުން ކުށްވެރި ކުރަން. ރައްޔިތުން މިކުންފުންޏަށް ކުރަމުންދާ އިތުބާރާއި، ޔަޤީންކަން ދެމެހެއްޓުމަށްޓަކައި ކުންފުނީގެ ވެރިންނާއި މުވައްޒަފުން ކުރަމުންދާ އިޚުލާސްތެރި ޚިދުމަތް އެގޮތުގައި ކުރިއަށް އޮތްތާނގައި ވެސް ކުރަމުންގެންދާނެކަމުގެ ޔަޤީންކަން އަރުވަން.“ ސްޓެލްކޯ އިން ބުންޏެވެ.
ކުންފުނީގެ މުވައްޒަފުންނަކީ ކަސްޓަމަރުންނާ އެއް އުސޫލެއްގެ ދަށުން ރީޑިން ނަގައި، އެ ރީޑިން އަށް ބިލް ކުރެވޭ ބައެއްކަން ސްޓެލްކޯ އިން ފާހަގަކޮށްފައިވާއިރު، ރީޑިން ނެގުމާއި ނުލައި އަދި ކަސްޓަމަރުން ބޭނުން ނުކުރާ ކަރަންޓަކަށް ބިލް ނުފޮނުވާނެ ކަމުގެ ޔަގީން ކަން އެ ކުންފުނިން ވަނީ ދީފައެވެ. އެ ނޫން އުސޫލަކުން ބިލް ކުރަމުންދޭތޯ ބަލަން ކަމާ ބެހޭ މުއައްސަސާތަކަށް ވެސް ސްޓެލްކޯ އިން ވަނީ ގޮވާލާފަ އެވެ.
